Приозерск қаласындағы әскери бөлімшелердің бірінде борышын өтеп жүрген сарбаз өзіне оқ атты. Туыстары мәлімдеме жасады, деп хабарлайды Neonomad.kz ақпараттық агенттігі КТК арнасына сілтеме жасап. 

Оқиға Қарағанды облысының Приозерск қаласындағы нөмірі 44841 әскери бөлімінде орын алды. Атырау тұрғыны Мағжан Тұрсұнқұлов қарумен ойнап отырып шүріппені абайсып алғанын айтады. Бұл нұсқаға оның туысқандары да сенеді.

«Ол ауруханаға жеткенде әлі естүсін білген. Дәрігер «Қанша оқ аттың?»  деп сұраған. «Бір оқ аттым, байқаусызда» деп айтқан. Блогерлер де, бәрі жазып жатыр. Отбасымызға ауыр болып тұр. Ондай нәрселерді доғартыңыздар. Інім өзін байқаусызда атып жіберді. Былай бәрі жақсы, Алла қаласа, бәрі жақсы болып кетеді», – дейді Рахман Қуанышев, сарбаздың туысы.

Сарбаздың туысының айтуынша, ол әскерге биыл мамырда шақыртылған. Оқу-жаттығу мерзімі бітіп, енді ғана қару ұстап жүрген бала оны қызықтап ойнағанға ұқсайды.

Оқиға болған кезде қарауыл басшысы дереу алғашқы көмек көрсетіп, жедел жәрдеммен ауруханаға жөнелтілген. Оның жағдайы ауыр.