Қазақстандық нейрохирург Ермек Кисаев емделушілерді хиджамадан бас тартуға шақырды. Айтуынша, оның пайдасынан зияны басым, деп хабарлайды Neonomad.kz ақпарат агенттігі Stan.kz ақпарат агенттігіне сілтеме жасап.

Дәрігер көптен бері хиджама туралы жазуға оқталып жүргенін жасырмады. Себебі, осы күнге дейін оның теріс пайдасын көрген науқастар алдына көп келген екен.

«Хиджама жасайтын дәрігерлер оның келесідегідей пайдалары барын айтады. Біріншіден, арам қанды ағзадан шығарып, жаңартады. Яғни қан толықтай тазарады. Екіншіден, микро айналым жақсарып, ағза пайдалы заттармен қоректенеді. Үшіншіден, мұны Мұхаммед пайғамбар да жасаған және басқаларға жасауға кеңес берген», – дейді дәрігер.

Яғни нейрохирург Ермек Кисаев көптеген хиджама жасап жүрген дәрігердің өзін осылай ақтап алатынын айтады.

«Қаныңызды тазартқыңыз келіп жүрсе, мұны донор болу арқылы жасаңыз. Оның үстіне қаныңыз тазарып қана қоймай, пайдалы іс тындырасыз. Біреудің өмірін құтқарып қалу мүмкіндігін туып тұрғанда қанды дәретханаға төккеніңіз дұрыс емес. Екіншіден, капиллярлық қан тамырда жиналады. Құрамы көктамыр қанымен ұқсас келеді. Үшіншіден, Хиджама жасатып жатып ЖҚТБ немесе В, С гепатиттерін жұқтырып алу қаупі басым. Ал қан тапсыру орталығында таза әрі бір реттік құралдар ғана қолданылады», – дейді ол.

Сондай-ақ, ол микро айналымды жақсартқысы келетіндерге спортпен шұғылдануға кеңес берді. Бұдан өзге көптеген дәрігердің хиджаманы бизнес көзіне айналдырып алғанын жасырмады.

«Көбінесе адамдар мұны бизнес секілді көреді. Мұны жасап жүрген азаматтардың медициналық білімі мен рұқсат қағаздары жоқ. Мұндайға пайғамбардың атын араластырып жатқан да ұят сияқты. Себебі, бұл ешқандай да діни процедура емес. Оның қандай да бір пайдасы бар екеніне күмәнданамын. Арада көп уақыт өтіп, түйе орнына мерседес мінуді жөн көріп отырмыз. ХХІ ғасырға лайық емделейікші», – деп қорытты сөзін Ермек Кисаев.