Ақтауда жеке балабақшалардың бірінде бір жастағы бала қайтыс болды. Бала күтуші бостандықта жүр, деп хабарлайды Neonomad.kz ақпараттық агенттігі «Астана» телеарнасына сілтеме жасап.
Оқиға 6 желтоқсанда Ақтауда болды. Бала күтуші жалға алған пәтерде тұрады. Ол үйде отырып, ақша табу үшін бала бағумен шұғылданған. Сол күні ата-анасы сәбиін алғаш рет аталмыш жекеменшік балабақшаға қалдырыпты. Сәби жеке балабақшаға келгеннен кейін бірнеше сағаттан соң қайтыс болған. Бала күтушісі болса дәрігерлерге: «нәресте жылап-жылап ұйықтап қалды, біраздан кейін қарасам ол көкпеңбек болып жатыр екен» деген.
«Жылап-жылап, содан кейін ұйықтап қалды. Одан кейін бір қарағанда бала күтуші оның көкпеңбек болып кеткенін көрген. Сөйтіп 103 нөміріне дереу қоңырау шалған. Жедел жәрдем барғанда бала дәлізде жатқан, ешқандай тыныс алу белгілері жоқ, ес-түссіз күйде, денесі суып кеткен, көгергенй», – Жайнагүл Ілясова, Маңғыстау шұғыл жедел жәрдем көмегі стансасы директорының орынбасары.
Дәрігерлер бала күтуші мен ата-анасының көзінше баланың өлгенін тіркейді. Бірақ отбасы оған сенбей баланы жан сақтау бөліміне жеткізуді талап етіп отырып алған.
Осыдан кейін бала ауруханаға жеткізілген. Айта кетейік, балада туа біткен дерт теркелмеген.
Оқиғаға қатысты қылмыстық іс қозғалды. Бала күтушісі тергеуге куәгер ретінде тартылған, сондықтан ол бостандықта жүр.
«Ақтаудағы жеке бала күтушілердің қызметін бақылау мүмкін емес», – дейді қалалық білім бөліміндегілер.
Мамандар сонымен бірге баланың өліміне ата-анасының да кінәсі бар деп санайды.
«Ата-аналар сұрауы керек, арнайы рұқсат қағазы бар ма бала бағуға деген. Біз рұқсат қағаз береміз. Бірақ кім көрінгенге емес. Оның өзіндік тәртібі бар. Тіпті, рұқсат қағазы болмаса да бала бағуға мамандығы сай келе ме, соны сұрауы керек қой. Әрине, бұл бала бағушы мен оған баласын тапсырушы арасындағы келісім, оған біз араласа алмаймыз», – Ақмарал Байсаханова, Ақмарал білім беру бөлімі жанындағы Мектепке дейінгі білімді дамыту кабинетінің меңгерушісі.
Өлімнің нақты себебі бір айдан кейін белгілі болады.
Еске сала кетейік, Ақтауда балабақшада 1 жасар бала көз жұмғандығы айтылған еді.
