Видеода көріп отырғандарыңыздай, вагонның іші адамға лық толы. Тіпті жүк қоятын сөрелерде де адамдар жатыр. Бұл аздай, тамбурда жас әйел мен кішкентай баланың ұйқтап жатқанын байқамау қиын. Әлеуметтік желіде тараған атышулы осы видеоға қатысты «Жолаушылар тасымалы» АҚ пікір білдірді, деп хабарлайды Neonomad.kz. 

Компанияның баспасөз қызметінің хабарлауынша, видеодағы көрініс «Маңғышлақ – Ақтөбе» бағытындағы №309/310 жолаушылар пойызында болған. Аталған факті бойынша, қызметтік тексеру жүргізіледі. Айыпты деп танылған қызметкерлермен еңбек шартын бұзуға дейінгі әкімшілік шаралар қабылданады.

«Бұл оқиғаның біздің пойызда болғаны расталды, енді Еңбек кодексіне сәйкес тексеру жүргізіледі. Мұндай видеолар компанияның бас директорының блогына келіп түседі және біз айыпты қызметкерлерге ең қатал жазаны қолданамыз», – деді «Жолаушылар тасымалы» АҚ Қызмет көрсету және клиенттермен жұмыс жасау департаментінің директоры Әлібек Сұлтанов.

Оның сөзінше, өткен жылдың сәуір айынан бастап компанияда «төзбеушілік» ұстанымы енгізілді. Яғни, заңсыз жолаушылар мен жүк тасымалдайтын қызметкерлер қатаң жағалана бастады. Бұл аралықта 130 адам жұмыстан шығарылып, 26 адамның лауазымы төмендеген.