Қызылордада жеңіл көлік апатқа ұшырады. Бірақ ең қорқыныштысы сол көліктің жүксалғышынан жеке такси жүргізушінің өлі денесі табылған, деп хабарлайды Neonomad.kz Облыстық полиция департаментіне сілтеме жасап. 

Полиция мәліметінше, шетелдік көлікті басқара алмаған жас жігіт электр тарату желісінің бағанына соқтығысқан. Артынан оқиға орнынан қашып кеткен.

Жол апаты болған жерге келген полиция қызметкерлері көлікті айып тұрағына сүйреп апаруы тиіс болған. Сөйтіп машинаны тексеріп жүргенде, жүксалғыштың ішінен жарақат алған ер адамның өлі денесін тапқан. Кейін белгілі болғандай, қайтыс болған адам жеке тасымалдаумен айналысқан автокөліктің иесі екен.

«Қазақстан Республикасы Қылмыстық кодексінің 99-бабы 2-бөлігі  (Адам өлтіру) бойынша  алдын ала тергеу жүргізіліп жатыр», – деп хабарлады Қызылорда облысының полиция департаменті.

Қылмыс дәлелденсе күдікті 15 жылдан 20 жылға дейін немесе өмір бойы бас бостандығынан айырылуы мүмкін.

Поиция мәліметінше, қылмысты жасады деген күдіктілер анықталып, ұсталды. Олардың бірі 26, екіншісі 41 жастағы Қызылорда облысының тұрғындары.