Түркістан облысында куәгерлер жігіттердің қыз алап қашқан сәтін видеоға түсіріп алған. Бейне әлеуметтік желіге жүктелді, деп хабарлайды Neonomad.kz ақпараттық агенттігі Nur.kz сайтына сілтеме жасап.
Куәгерлер түсірген видео Instagram желісіндегі v.shymkente парақшасына жүктелді. Және роликтің астына «Кешегі зоосаябақтан қашып кеткендер осылар ғой деймін» деп жазылған.
Видеодан үш жігіт қарсылық танытқанына қарамастан қызды автокөлікке күштеп мінгізгенін анық көруге болады. Сол жердегі ер адам жігіттерге кедергі келтірмек болған. Алайда олардың бірі ер азаматты итеріп, жерге құлатқан.
Tengrinews.kz хабарлауынша, Түркістан облысы Полиция департаменті роликтегі оқиғаны растап, оның 23 желтоқсанда Арыс қаласында болғанын мәлімдеген. Жігіт бойжеткенді үйлену мақсатында алып қашқан.
«Бүгін арыстық полиция бөлімшесіне жергілікті тұрғын, зардап шегушінің анасы келді. Оның арызы Қылмыстық Кодекстің 125 бабы «Адам ұрлығы» бойынша тіркелді. Қазіргі уақытта сотқа дейінгі тергеу амалдары жүргізілуде», – деді Полиция департаментінің баспасөз қызметі.
Бойжеткен алып қашқан жігіттен бас тартып, өзінің үйіне оралған.
