Қазақстанның елордасында жалғызбасты ана төрт баласымен бірген жертөле паналап жүр, деп хабарлайды Neonomad.kz «Астана» телеарнасына сілтеме жасап. 

Биліктен пәтер сұраған әйел балаларымен бірге соңғы жарты жылда жертөледе тұрады. Бұған қоса, тұрақты табысы да жоқ екен. Тек атаулы әлеуметтік көмектің арқасында көпбалалы отбасы күн көріп отыр. Жалғызбасты ана жұмыс істейін десе 4 баласын қараусыз тастап кете алмайтынын айтады.

«Бір жерде тұрдым. Ол суық болды, 45 мыңға жалдадым. Оған ақша керек, ақшам болған жоқ. Қосымша коммуналық қызмет ақысы болды. Сосын жағдайым болмай, осы жерге көшіп келдік. Алимент төлемейді. Өйткені жұмысы да жоқ», – дейді Бибіғайша Исабекова.

Мемлекеттен баспана алайын десе Нұр-Сұлтанда үш жылдан бері тұратынын растайтын анықтамасы жоқ. Яғни, ала алмай жүр. Ол анықтамасыз пәтер берілмейді. Бибіғайшаның сөзінше, жауапты мекеме мәселені шешуден ат тонын ала қашқан.

«Мені жібермеген жері жоқ. Үш рет сотқа бардым. Құжатыңыз дұрыс емес, сіз бізге қарамайсыз деп, тағы да басқа жерге жібереді. Ол жақта да менің мәселемді ешкімнің қарағысы жоқ. Осылай жүргеніме жарты жыл болды», – дейді кейіпкер.

Бір қызығы, әкімдіктегілер жалғызбасты ананың жағдайынан хабардар болып шықты.

«Мен оның балаларымен бұл жерде тұрғанына қарсы емеспін. 4 баласымен жалғыз әйел қайда барады? Бірақ мұнда ешқандай жағдай жасалмаған. Не су, не жарық жоқ. Ондай жерде адам қалай өмір сүреді?! Байқоңыр ауданы әкімінің аппараты жалғызбасты ананың жағдайынан хабардар»,- дейді жертөленің иесі Саяна Смағұлова.

Тілшілер жалғызбасты ананың балаларымен жертөледе тұратынын Жұмыспен қамту және әлеуметтік қорғау басқармасына жеткізгенімен, бірақ олар үнсіз отыр.