Жамбыл облысында еңбек ақысын ал алмай жүрген жұмысшылар биіктен секіруге талпынды, деп хабарлайды Neonomad.kz ақпараттық агенттігі КТК арнасына сілтеме жасап. 

Белгілі болғандай, бес адам бірігіп тапсырыс алады. Олар тротуар төсеп беруі тиіс болған. Тапсырыс құны 2 млн 180 мың теңге. Бірақ олардың жұмысына көңілі толмаған мердігер бәрін бұзғызып, қайта істеуді тапсырады.

Жұмысшылар еңбек ақысын талар еткенде, мердігер бас тартқан. Сөйтіп бес адам су мұнарасына шығып алып, талаптары орындалмаса өздерін өлімге қиятынын айтқан.

Жеті сағаттық келіссөзден соң бас мердігер жалақыларының бір бөлігін беруге келісті. Яғни, сұралған 1 млн 300 мың теңгенің 800 мың теңгесі қолма-қол қайтарылды. Содан кейін шу көтергендер жерге түскен.

Бірақ бас мердігер жұмысшылардың әрекеті заңсыз, «бопсалау» деп тұр.

«Заңсыз алып тұр, бұл бопсалау болып тұр. Бізге әлі акті келген жоқ. Істелген жұмыстарына енді алып келеді. Акті болмағандықтан, біз ақшаны төлей алмаймыз. Бұлардың істеген жұмысы бар, бірақ дұрыс емес. Сондықтан техқадағалау қабылдамай, бұзып тастады», – дейді бас мердігер Жұмағұл Байменов.