2020 жылдан бастап газбен жүретін көліктерді паркингке қоюға рұқсат берілмейді, деп хабарлайды Neonomad.kz ақпараттық агенттігі «Хабар 24» телеарнасына сілтеме жасап.
Төтенше жағдайлар комитетінің төрағасы Владимир Беккердің мәліметінше, соңғы уақытта газ баллон орнатқан көліктердің жарылуы жиілеп кеткен. Мұндай көліктер қазір тұрғын үйлердің жер асты тұрақтарына да, сауда-ойын-сауық орталықтарына да емін-еркін кіріп жүр. Жүргізушілердің көбі арзан бағасына қызығып, дәстүрлі отыннан газға көше бастаған. Сапасыз баллон орнатып алғанда, қауіп туралы ойламайды дейді. Жалпы күн суытқалы бері автокөліктердің отқа орануы жиілеген. Тек өткен аптада ғана автокөліктердің өртенуінің 68 жағдайы тіркелді.
«Газдан болатын қауіптің алдын алу мақсатында біз ережелердің, соның ішінде құрылыс ережелерінің талаптарына тиісті өзгерістер енгізу қажеттігін ойластырдық. Себебі газ бензинге қарағанда қауіпті. Әсіресе, көлік жер асты тұрағында тұрса, қауіп ұлғая түседі. Жарылыс болған жағдайда салдары өте ауыр болады. Үлкен ғимарат қирауы мүмкін. Газ жабдығы бар автомобильдердің жер асты паркингтеріне кіруіне тыйым салу туралы ұсыныс жасап жатырмыз», – деді Владимир Беккер, ҚР ІІМ төтенше жағдайлар комитетінің төрағасы.
