2020 жылдан бастап «Еңбек» мемлекеттік бағдарламасы аясында Алматының жұмыссыз жүрген тұрғындары солтүстікке көшіріледі, деп хабарлайды Neonomad.kz ақпараттық агенттігі КТК телеарнасына сілтеме жасап.
Басты мақсат – солтүстіктегі тапшы кадрлардың қатарын толықтыру, жұмыссыздар санын азайту. Сондықтан Үкімет 2020 жылы тұрақты табысы жоқ 6 мың адамды көшіруді жоспарлап отыр.
Өйткені оңтүстік өңірлерде халықтың өсу қарқыны жоғары. «Еңбек» мемлекеттік бағдарламасы аясында ерікті қоныс аудару әркімнің өз еркі. Енді бұл тізімге Алматы халқы да еніп отыр. 2020 жылдан бастап педагогикалық және техникалық мамандықтарды игерген кадрларды қабылдайтын облыстардың қатарына Қарағанды мен Ақмола қосылмақ.
«Еңбек» бағдарламасы жүзеге асырылғалы оңтүстіктен солтүстіккке 18 мың адам қоныс аударған. Бұл шамамен 5 мың отбасы. Биыл солтүстік аймақтарға 8 мың адам көшкен.
«Алматы облысында қазір 1 млн 800 мыңнан астам халық тұрады. Оның 50 мыңнан астамы жұмыссыз азаматтар және бұл ретте Алматы қаласы бойынша жұмыссыздық деңгейі 5,1 пайызды құрайды. Бұл орташа республикалық деңгейден 0,3 пайыздық деңгейге жоғары», – деді Рауан Қапан, Еңбек және халықты әлеуметтік қорғау министрлігі, халықты жұмыспен қамту департаментінің сарапшысы.
