Атырауда Теңіздегі даудан соң 200-ге жуық жұмысшылар далада қалды, деп хабарлайды Neonomad.kz «Бірінші Еуразия» арнасына сілтеме жасап. 

Телеарнаның мәліметінше, Теңіздегі ереуілден кейін кейбір қызметкерлерге демалыс беріліп, жұмыс уақытша тоқтатылған. Сол кезде жұмысшыларды қолдауға келген облыс әкімі Нұрлан Ноғаев мәселені бақылауда ұстаймын деген екен. Бірақ жұмысшыларға компаниядан хабарласып, келісімшарттың бұзылғаны туралы мәлімдеген. Сайып келгенде, 200-ге жуық қызметкер жұмыссыз қалды.

«Шок болып қалдық. Кредитіміз бар, бала-шағамыз бар. Бұлай бір күнде қысқартып жіберуге олардың қақысы жоқ қой. Алдын ала ескертіп айтуы керек. Біз жұмыс іздейтін едік. Өйткен жоқ бұлар», – деді Жеткербай Күлімжайов.

Осы уақытқа дейін облыс әкімінің сөзіне сеніп келген олар «Ноағаев лақтырып» кетті деп есептейді.

«Жұмыстан шығасыңдар деген әңгіме болған жоқ. Әлгі шу шыққан кезде облыс әкімі Нұрлан Ноғаев келген. Өзі айтты сол кісінің: «Қорықпаңдар, ешқандай жұмыстан қысқарту деген болмайды» деген. Қайда сол сөзі әкімнің», – дейді жұмыссыз қалған Жасұлан Қабдешев.

Жұмыстан шығып қалған қызметкерлердің сөзінше, басқа фирмаларға компаниядан кеткендерді «жұмысқа қабылдамаңдар» деп те бұйырған көрінеді.

Ал еңбек инспекциясы жұмыс берушілердің бұл әрекеті заңды дегенге келтіреді.

«Жұмысшылардың келісімшарттары белгілі бір жұмыстың аяқталуына дейін жасалған. Егер де ол жұмыстың аяқталатын уақыты келген жағдайда жұмыс беруші еңбек шартын бұзуға құқылы», – дейді Атырау облысы мемлекеттік еңбек инспекциясының бөлім басшысы Кемел Иманғалиев.

Еске сала кетсек, Теңіздегі 3GI зауытының мыңға жуық жұмысшысы ереуілге шықты. Бұған Ливия азаматы Ели Даудтың (Eli Daoud) әлеуметтік желідегі суреті себеп болған. Ол фотода рация ұстап тұр. Ал рацияның антеннасы жанындағы қазақ қызының ерніне тигенін көруге болады. Ереуілдің салдарынан шетел азаматтары жарақ алып, ауруханаға жеткізілген болатын.