Байқоңырда балалар бір-біріне тас лақтырып ойнап жүріп 2-сынып оқушысының көзін ағызып жіберді. Жайсыз оқиға тамыз айының 1-жұлдызында болған. Сондай-ақ, өңірде тиісті дәрігерлер болмағандықтан, ота басқа қалада тек бір күннен кейін ғана жасалды, деп хабарлайды Neonomad.kz ақпарат агенттігі.
Оқушы сіңілінің басынан өткен оқиғаны Йоханна Ақбергенова баяндап берді. 5-6 жасар балалар үйдің шатырында ойнап жүріп, 2-сынып оқушысына қарай тас лақтырған.
«Осы сәтте тас сіңілімнің көзіне тиіп, оның жанары ағып кетті. Қатты ауырғаннан сол жерде отырып жылаған. Өкінішке орай, Байқоңырда түсініксіз жағдайлар болып жатыр. Медицина қызметкерлерін 2007 жылдан бастап қысқартуға уәде берген. Екінші қалалық аурухана ғимаратын қарттар үйіне айналдырмақ болған. Жаңа перзентхана жабылған. Сондай-ақ, балалар ауруханасы жабылған. Мен бұл нәрсенің немен байланысты екенін білмеймін – қаржы ма әлде басқа нәрсе ме? Бірақ Қазақстан мен Ресей халқы тұрып жатқан Байқоңырда адамдардың медициналық көмексіз қалып отырғаны факт. Егер балалар емханасы жабылмағанда, балалар окулисі қаладан басқа жаққа жұмыс іздеп кетпес пе еді кім білсін?» – дейді әйел.
Бұл кезде қыз бала Байқоңыр маңындағы Ақай ауылындағы әжесінің үйінде болған. Оқиғадан кейін шақырылған жедел жәрдем араға бір сағат салып қана келген. Байқоңыр ауруханасына жеткізілгенімен, ол жерде тиісті мамандар болмай шыққан. Артынша қыз баланы ата-анасы Қызылордаға өзі апарып, туыстарының арқасында тұрғылықты мекенжай тіркеуінсіз ота жасатқан.
«Қыздың алдында қаншама мүмкіндіктің есігі жабылып отыр. Әңгіме тек актриса немесе тележүргізуші сияқты мамандықтар туралы айтылып тұрған жоқ. Қыздың соқыр болып қалғанына кім кінәлі? 5 қызы өртенгені үшін ерлі-зайыпты Ситтерді айыптағандар тілдеріңізді тістеңіздер. Меніңше, қоғам кінәлі. Бізде батыр тәрбиелейміз деп зорлық, таяқпен төбелесіп, бір-біріне тас лақтыруға норма ретінде қарайды», – дейді ол.
Сөз соңында Йоханна Ақбергенова шенеуніктерден неліктен Байқоңырда балалар ауруханасының, тиісті мамандардың жұмыс істемейтінін сұрады. Мұнымен қатар, неліктен Қызылорда дәрігерлері мен шенеуніктерінің қыз баланы басқа жаққа тасымалдап апару мүмкін емес деп айтқанын түсінбей отырғанын жеткізді.
