Қытайға білімін арттыруға кеткен қызымыздың елге денесі қайтты. Қытай полициясы ол өз-өзіне қол жұмсаған десе, қыздың құрбылары Сандираны біреулер 17-ші қабаттан құлатып жіберген дейді. Бірақ қыз өмірінің соңғы сәттерінде қандай күйде болғаны белгілі болды, деп хабарлайды Neonomad.kz KTK телеарнасына сілтеме жасап.
Қайғылы оқиға суицид деп жабулы күйінде қалды. Бірақ туыстары бұған еш сенбейді. Өйткені қыздың құрбылары, тіпті өмірінің соңғы сәттері қылмыстық істің барын меңзейді.
Сандира Серікхан, Нұр-Сұлтан қаласының тұрғыны. Чанчжоу қаласындағы Jiangsu University of Technology үшінші курсын тәмамдаған. Өз күшімен грантқа түскен ақылды қыз. Қытай тілін жарты жылдың ішінде меңгеріп алыпты. Білімін жетілдіремін деп Қытай асқан қыз 19 жасында жұмбақ жағдайда көз жұмды.
Кейбір деректер бойынша, қайғылы оқиға үстіміздегі жылдың 26-шы сәуірінде болған. Ал Қытай полициясының ресми мәліметі бойынша, сабағын 5-ке оқып жүрген қыз өз еркімен 17-ші қабаттан секіріп кеткен.
«Сандира суицид жасады дегенге сенбейміз. Ол жазғы демалысқа үйге жиналып жатқан. Сол күннің алдында ғана видеомен сөйлестік. Бауырларына сатып алған сыйлықтарын көрсетіп, анасымен мәз-мейрам болған. Қызымызды әдейі өлтіріп отыр», – дейді марқұм қыздың нағашы әпкесі Әлнұр Ағаева.
Басылымның ақпаратынша, Сандираны Баян деген құрбысы клубқа баруға көндіреді. Онда Мадияр және Данияр деген достарымен таныстырған. Клубтан соң Данияр деген жігіт пәтерінде ұмытып қалдырған бір затын алу керек деп, қызды өзімен баруға көндірген. Сөйтіп жігітпен подъезге дейін жеткен қыз, табалдырықтан аттағысы келмеген. Қыздың әрі қарай жүргісі келмей тұрғаны подъездегі бейне бақылауға түскен. Видеода жігіт қызды жетектеп кіргізген дейді Әлнұр Ағаева, қайтыс болған қыздың әпкесі. Біраздан соң Сандира пәтерден жылап шығады. Әрі қарайғы жағдай таспадан тыс жерде жалғасқан.
Жігіттің айтуынша, қыздың 17-ші қабаттан қалай құлап кеткені есінде жоқ. Не үшін жылап жүргенін де түсіндіріп бере алмапты.
«Данияр Иманқұлов деген жігіт Шымкенттен. Қыз неге жылады деген сұраққа жауап бере алмады. Айтуынша, өзі де шокта болған», – деп толықтырды Сандираның нағашы әпкесі.
Білмейміннен басқаны айтпаған жігіт жоқ болып кетті. Қыздың әкесі оларды іздеп барғанымен, жолығудан бас тартқан, тіпті телефондарын сөндіріп тастаған. Осыдан соң туыстары зорлық-зомбылық жасалды ма деп күдіктенеді. Одан қалды, қыздың бір аяқ киімі терезенің тұсында қалып қойған. Жақтаудан саусақ іздері табылмаған. Сол себепті де оны біреудің терезеден лақтырып жібергеніне сенімді. Бірақ мұны дәлелдеу мүмкін болмай тұр. Өйткені Қытай заңы бойынша, мәйітті 30 күн тексереді екен. Мұншама уақыт күте алмаған отбасы қыздың денесін сараптамасыз елге әкелуге мәжбүр болған. Ал іс «суицид» деп жабылып тынған. Еліміздің дипломаттары істі қайта қарауды сұрапты. Бірақ қорытындысы өзгермеген.
«Қытай тарапы бұл істі қайта қарап шықты. Оның нәтижесі бойынша жазатайым оқиға болып шықты», – деп түсіндірді сыртқы істер министрлігінің ресми өкілі Айбек Смадияров.
Еске сала кетсек, осыған дейін біз Қытайда қайтыс болған қазақ қызы туралы жазған болатынбыз. Онда қыздың әпкесі: «Қолымызда тек қайтыс болғаны туралы куәлік бар, бізге сот-медициналық сараптаманың қорытындысын да, оқиға орнынан фото немесе бейне берген жоқ. Сол жігіттер мен қыздар бізді барлық әлеуметтік желілерде бұғаттап, байланысты үзді, Қазақстанға демалысқа қайтып келмеді», – деп айтқан болатын.
