Қазақстанда 20 мен 30 маусым аралықтарында Ұлттық біріңғай тестілеу болып, оған 110 472 мектеп түлегі қатысқан болатын. Соның 75,8% ғана шекті балл жинай алды, деп хабарлайды Neonomad.kz.
Ұлттық тестілеу орталығының директорының міндетін атқарушы Дидар Смағұловтың ақпаратынша, 27 мыңнан астам түлек тестілеуден өте алмаған.
«Өкінішке орай, бұл көрсеткіш өсіп келеді. Өткен жылы тесттен өтпегендердің саны 15% болса, биыл 25,2% жетті. Бақылаудың күшейуімен байланысты деп ойлаймыз. Үстіміздегі жылы ҰБТ-ге алғаш рет ҚР Білім және ғылым министрлігінің білім саласындағы бақылау Комитетіның өкілдері қатысты. Біздің қызметкерлер онлайн-бақлау арқылы жемқорлыққа қарсы шаралар қолданды. Күдік тудырған қандайда бір дәйектерге тез назар аударып отырдық», – деді Дидар Смағұлов.
Оның сөзінше, тестілеуге өзінің орнына басқа біреулерді өткізуге талпынған түлектер болыпты. Бірақ күрделі заң бұзушылықтар тіркелген жағдайда, құқық қорғау органдарына хабар берген.
«Биыл аппеляцияға 326 арыз түскен. Өткен жылмен салыстырғанда, екі есе кем. Бұл дегеніміз, тестілеу сұрақтарының сапасы көтерілгендігін білдіреді. 155 аппеляциялық арыз қанағаттандырылды. Сұрақтың объективтілігіне күмән туса, онда шешім түлекті қолдап шығарылған», – деді Смағұлов.
Сондай-ақ, туындаған күмәнді сұрақ бойынша түскен арыз аппеляцияда қанағаттандырылса, онда сол сұрақ ҰБТ базасынан алынып тасталаты белгілі болды. Және сол сұрақтарды құрастырған эксперттермен қосымша жұмыс жүргізілетін болады.
Дидар Смағұлов ҰБТ-ға қатысу үшін 117 мың адам ниет білдіріп, соның тек 110 мың адамы ғана қатысқанын түсіндіріп өтті. Белгілі болғандай, тестілеуге 6800 түлек келмеген.
