Қостанай облысында үй өртеніп, тілсіз жау төрт адамның өмірін қиды, деп хабарлайды Neonomad.kz ақпараттық агенттігі qostanai.media сайтына сілтеме жасап. 

Қайғылы оқиға 15 желтоқсанда болған. Торғай ауылында кешкі асқа отырған отбасы тілсіз жаудың құрбаны болды. Өрт болған кезде үйде он адам болған. Бесеуі ересек, қалған бесуі бала. Қызыл жалын 20 минут ішінде үйді ортасына түсіріп, шатырды қиратқан.

Қостанай облытық Төтенше жағдайлар департаментінің мамандары өрттің неден шыққанын анықтап жатыр. Оқиға орнынан бүлінген газ баллоны табылды.

1986 жылғы ер адам мен 1997 жылғы қыз күйік шалып, ауруханаға түсті. Бірінің денесінің 45 процентін, тағы бірінікін 40 процент күйік шалған.

2009, 2011 және 2014 жылғы балалар да ІІ-дәрежелі күйікпен Арқалық қаласының ауруханасында жатыр.

Өрт болған жерден 1938 және 1985 жылғы екі әйелдің өлі денесі табылды. Сондай-ақ әлі бір жасқа толмаған екі нәресте көз жұмды. Біреуі – ұл, біреуі – қыз бала.

Отбасының бір мүшесі өрт болған кезде жұмыста болған. Ер адам қайғылы жағдайды кейін білді.