Қарағанды облысында анасын аяусыз ұрып-соғып, айуандық әрекет танытқан бойжеткенге шартты жаза тағайындалды, деп хабарлайды Neonomad.kz ақпарат агенттігі.
Жаңа жыл мерекесі кезінде Теміртау тұрғыны бала күнгі ренішін еске алып, анасын ұра бастайды. Қария өз кезегінде ішімдік ішіп алған қызынан ваннаға жасырынбақ болады. Алайда қызы оның соңынан барып тағы да соққының астына алады.
Ашуға бой алдырған бойжеткен анасының басын ыстық судың астында талып қалғанша ұстап тұрған. Тергеу барысында әйел өз кінәсін толықтай мойындады. Ол анасына өзін кішкентай күнінде балалар үйіне өткізіп жібергені үшін ашуланғанын айтты.
Сот-медициналық сараптама кезінде жәбірленушінің бет, мойын, кеудесінің күйгені белгілі болды. Күйіктің жалпы аумағы дененің 12%-ін құрайды. Сондай-ақ, 8, 9, 10-қабырғалары сынған. Өкпесі мен миына да зақым келген.
Әйел ҚР ҚК 106-бабы бойынша кінәлі деп танылды. Аталған бапқа сәйкес, 5 жылға бас бостандығынан айырылды. Алайда ҚР ҚК 63-бабына сәйкес, оған барлық мерзім бойынша пробациялық бақылау орната отырып, жазасын шартты түрде өтейді.
