Павлодарда техникалық байқауды WhatsApp арқылы өткізгендер ұсталды. Қызметі үшін небәрі үш жарым мың теңге сұраған, деп хабарлайды Neonomad.kz KTK телеарнасына сілтеме жасап.
Павлодарда көлігіңді көрсету үшін жол жүріп, одан кейін кезекте тұрудың қажеті жоқ. Өйткені көлігіңді көрмей-ақ техникалық байқаудан өткізіп береді. Машинаға тиесіл құжаттардың суреттерін ватсап месенджері арқылы жіберсең болғаны.
Жалған «техникалық пункттер» көліктің техникалық жағдайына, жүруге жарамды екеніне басын қатырып отырмайды. Үш жарым мың теңге берсең, кепілдік құжатын береді. Артынша, техникалық байқаудан өтті деген қағазды айтылған мекен жайдан алып кетуіңізге болады. Павлодарда пайда болған бұл «қызмет» түрін әуелі қоғамдық белсенділер анықтаған. Эксперимент жасап, көздері жеткен соң, құзырлы орындарға тапсырыпты. Қазір заңсыз қызметке дәніккен басқа да жалған пункттер іздестіріліп жатыр.
