Өзбекстанның танымал актрисасы такси жүргізушісінің ұятсыз әрекетінен соң көліктен секіріп, қайтыс болды, деп хабарлайды Neonomad.kz ақпараттық агенттігі Gazeta.uz сайтына сілтеме жасап.

Қайғылы оқиға 18 қарашада Қашқадарья облысы Гузар ауданы «Яргунчи» махалласы аумағындағы болған. «Самарқанд-Гузар» А-380 автожолында келе жатқан lsuzu жүк көлігінің 29 жастағы жүргізушісі 39 жастағы актрисаға тиісе бастаған екен. Ал Шарипова амалсыздан көлік салонынан секіріп кетуге мәжбүр болыпты.

Оқиға түнгі 02.20 шамасында болған екен.

«Облыстық ЖҚҚБ ақпараты бойынша, жүк көлігі тас жолда сағатына 140 шақырым жылдамдықпен келе жатады. Жүргізуші сол қолымен рөлді ұстап, оң қолымен жолаушы орнында отырған Гавхар Шарипованың арқасы мен қолын ұстай бастапты. Актриса есікті ашқанына қарамастан, ол жылдамдықты тоқтатпай, жолда жүру ережесінің 77- бабы 3- бөлігін бұзған»,- делінген мәліметте.

Гавхар Шарипова көлік салонынан жолға секіріп, алған жарақаттарынан оқиға орнында көз жұмған.

Аталымыш фактіге қатысты Гузар аудандық ІІБ тергеу бөлімі Қылмыстық кодекстің 266- бабы 2- бөлігі (адам өліміне әкеп соққан көлік құралдарының қозғалысы немесе оларды пайдалану қауіпсіздігі қағидаларын бұзу) бойынша қылмыстық іс қозғады.

Қазір алдын ала тергеу жұмыстары жүріп жатыр.

Гавхар Шарипова «Алпомыш», «Сарвиноз», «Алданған әйел», «Әпке» және тағы басқа фильмдерге түскен.