Ақтөбеде кәмелет жасына толмаған ұл бала өз үйінде асылып өлді. Оны анасы тауып алған, деп хабарлайды Neonomad.kz ақпараттық агенттігі Nur.kz сайтына сілтеме жасап. 

Қайғылы оқиға 30 қыркүйекте болған. Сол күні сабағына барып келген бозбала, түскен кейін өзіне қол салған. Әзірге себебі белгісіз.

Белгілі болғандай, отбасы жалдамалы пәтерде тұрады. Үш баланы жалғыз өзі бағып-қағып отырған ана тұңғышын асулы күйІнде тапқан.

«Бұлай болады деп мен ешқашан ойлаған жоқпын. Кешкі сағат 6:30-да келгенімде салбырап тұр екен. Өзім шешіп алдым. Тұңғышым еді… Ешкімге кінә артпаймын, ажалы болар», – дейді анасы.

Өзіне қол салған ұл бала осыған дейін Хромтауда тұрған. Ұстаздары өмірімен ерте қоштасқан жасөспірімді «ақжарқын бала еді»деп еске алады.

«Бұл жағдай бізге де ауыр тиіп отыр. Биыл 2 қыркүйектен бастап біздің мектепте 8 сыныпта оқыған еді. Бала бір күн де сабақтан қалған жоқ. Қайғылы оқиға болған күні де сабаққа келді, жеті сабағына да қатысты. Мінезі ашық, ақжарқын бала болған соң қатарластарымен тез араласып кетті. Педагогикалық-психологиялық мінездемесінде ешқандай күдік болған жоқ. Мамасының айтуынша, бала көп нәрсені ішінде ұстайды екен. Әкелері қайтыс болған. Мамасы «Ақтөбеге көшейік деген балам еді, ауылда балалар жетімсің деген соң қалаға келіп едік» деп айтты. Олар бір бөлмелі пәтерді жалдап тұрды», – дейді мектептің директоры Шолпан Жанғалиева.

Оқиғаға қатысты тәртіп сақшылар іс қозғады.

«30 қыркүйек күні кәмелеттік жасқа толмаған жасөспірім өз үйінде асылып қалған күйінде табылды. Бала ешқандай есепте тұрмаған, оқу орны бойынша жағымды сипатталады. Аталған дерек бойынша ҚР ҚК-нің 105 бабы 3 тармағымен сот алды тергеу амалдары басталды», – деп хабарлайды ПД.