Алматы әуежайы сатылады. Оны түркиялық бір компания сатып алуы мүмкін, деп хабарлайды Neonomad.kz ақпараттық агенттігі Tengrinews.kz сайтына сілтеме жасап.

«Қазір түркиялық бір компаниямен келіссөздер жүріп жатыр. Дәл қазір ештеңе айта алмаймын, өйткені бұл әлі бітпеген іс. Алматы әуежайы жеке компанияның иелігінде, сол себепті реализация жүріп жатыр. Азаматтық авиация комитетімен келісу мәселелері бойынша қажетті шаралар істелініп жатыр», – деді министр үкімет отырысында.

Индустрия және инфрақұрылымдық дамыту министрі Атамқұлов, алматылық әуежайды сату арқылы қызмет көрсету сапасын жақсартамыз дейді. Сонымен қатар ол, қосымша инвестиция тартылатынын айтты.

«Менің білуімше, бірнеше әуежайды иелік ететін компания келе жатыр. Оның ішінде екі әуежай Францияда орналасқан. Алматы әуежайы – Орта Азиядағы ең ірі әуежайлардың бірі. Бізге модернизация мен жолаушылар терминалын жөндеуден өткізу керек. Мұның барлығы жолаушылар үшін. Жыл санап алматылық әуежай арқылы ұшатын жолаушылар саны артып келеді. Таяуда министрліктің бұйрығымен «ашық аспан» жобасы қабылданды, бұл бағыттарды көбейтуге мүмкіндік береді», – деді ИИДМ басшысы.