Түркістан облысының тұрғыны полиция қызметкерлерінің көлігінде толғағы қысып, дүниеге ұл бала алып келді, деп хабарлайды Neonomad.kz ақпарат агенттігі Stan.kz сайтына сілтеме жасап.

Полиция қызметкерлерінің айтуынша, кешкі сағат 20:00 шамасында көрші ауылдың тұрғыны әйеліне көмек керек екенін және жедел жәрдемге хабарласа алмағанын айтып телефон соққан. Үшқайық ауылдық округі полициясының учаскелік инспекторлары, полиция майоры Нұрбол Темірханұлы мен полиция капитаны Бақтыбай Қалабаев көмек сұраған ер адамның ай-күні жетіп отырған жүкті әйеліне қол ұшын беруге жолға шыққан.

Полицейлер қоңырау түскеннен кейін бірден Үшқайық ауылынан 50 шақырым жерде орналасқан ауылға бағыт алады. Жарты сағат ішінде шақырылған мекенжайға жеткен тәртіп сақшылары ер адам мен оның жүкті әйелі Виолетта Раковицаны қызметтік көлігіне отырғызып, Кентау қаласындағы перзентханаға тартыпты.

«Осы кезде әйелге медициналық көмек қажет болды. Көліктің ішінде оның толғағы қысып, Түркістан қаласына кірер жолда босанды. Нәтижесінде, полицейлердің көмегімен, қызметтік көлікте ұл бала өмірге келді. Арада біраз уақыт өткеннен кейін жедел жәрдем бригадасы келіп, жас босанған ана мен нәрестені Түркістан қаласындағы ауруханаға алып кетті», – дейді полиция департаментіндегілер.

Екінші рет ата-ана атанған ерлі-зайыпты өз кезегінде полиция қызметкерлеріне алғыс білдірді.

«Кішкентай ұлымыз, ең бірінші кезекте, полицейлердің арқасында аман-есен дүниеге келді. Егер олар ауылға жетіп үлгермегенде, әйелім мен ұлыма не боларын білмеймін. Полиция қызметкерлеріне алғыс білдіргім келеді. Бұған дейін учаскелік инспекторлар ауыл тұрғындарына қажет жағдайда хабарласу үшін, өз телефон нөмірін берген еді. Бірінші кезекте осыны есіме түсіріп, бірден учаскелік инспекторға хабарластым. Және олар бізге көмек қолын созды. Оларға алғысым шексіз!» – дейді жас әке Виталий Барабаш.

Бүгінде жас босанған әйел мен перзентінің жағдайы жақсы. Олар перзентханадан үйіне шығарылды.