Алматы облысында сотталушыларды азаптаған деген айыппен колония басшылары жұмыстан қуылды, деп хабарлайды Neonomad.kz Ішкі істер министрлігінің ресми өкіліне сілтеме жасап.
Әлеуметтік желілерде тараған бір видео қызметтік тексеріс жүргізуге себеп болды. Онда түрме қызметкерлері сотталушыларды спортзалда азаптап жатқаны түсірілген. Нақтырақ айтсақ, әскери форма киген қызметкер бір адамды іліп қойып, оның басынан теуіп жатқаны көрсетілген.
Сол бейнеден кейін Ішкі істер министрлігінің жедел түрде құрған комиссиясы Заречный ауылындағы ЛА 155/2 мекемесін жіті тексерген. Нәтижесінде колония басшысы мен оның екі бірдей орынбасары жұмыстан қуылды.
«Тәртіптік комиссия нәтижесі бойынша 14 адам түрлі жауапкершілікке тартылып отыр. Оның ішінде 7-і екі осы мекеменің орынбасарлары, бастығының орынбасарлары қызметтен қуылды және осы мекеменің бастығы яғни 155/8 соттау мекемесінің бастығы орнынан босады. Сонымен қатар қылмыстық атқару жүйесі Алматы қалалық департаменті басшысына қатаң яғни тәртіптік жауапкершілікке тартылды»,- деді ІІМ ресми өкілі Нұрділдә Ораз.
