Өскеменде жергілікті колледждің екі студенті бейбіт күннің батырлары атанды. Олар екі бірдей отбасын оттан арашалап қалған, деп хабарлайды Neonomad.kz ақпарат агенттігі «Астана» арнасына сілтеме жасап.
80-жастағы зейнеткерді өрттен құтқарып, көршілерін оятып, жедел жәрдем мен өрт сөндірушілерді шақырыпты. Төтенше жағдай қызметкерлері келгенше, қызыл жалынды өздері ауыздықтауға да тырысыпты. Батыр жігіттер туралы келесі бейматериалда. 18 жастағы Денис Печугин қызыл жалынмен бетпе бет келгендегі қауіпті жақсы біледі.
Айтуынша, өрт болған күні ол Алишер есімді досымен бірге дүкеннің жанынан өтіп бара жатқан. Екеуі тұрғын үйдің бірінің шатыры жанып жатқанын көреді. Бірден терезелерді сындырып, тұрғындарды құтқаруға көшеді. Өрт зейнеткер Вера Новикованың үйіне дейін жеткенде, ойланбастан оттың астына да кіреді.
«Үйдің іші қап-қарпа түтін болып кетті. Кіріп әжейді сыртқа алып шықтық. Әжеден тағы біреу қалды ма деп сұрап едім. Ол кісі ешкім жоқ деді. Сонда да, ішке қайта кіріп, тексеріп қайттым. Бәрі бізді таңертең бері батырсыңдар деп, құттықтап жатыр. Колледж директорының өзі құттықтады. Мен өзімді батыр санамаймын, азаматтық борышым», – деді колледж студенті Денис Пичугин.
Жігіт үйді толығымен тексеріп шыққан. Баспананың ішіндегі жарылғыш баллондарды да сыртқа шығарыпты. Өрт сөндірушілер келгенге дейін қызыл жалын көрші үйге өтіп кетпесі үшін отты ауыздықтаған.
Төтеншеліктердің мәліметінше, өрт шаруашылық блогынан шыққан. Мұнда көмір өртеніпті. От ағашқа, артынан құрылыс аумағына тараған. Оқиға орнына келген өрт сөндірушілер жанып жатқан асханадағы газ баллонын шығарып үлгеріпті.
Төтеншеліктердің мәліметінше, өрт шаруашылық блогынан шыққан. Мұнда көмір өртеніпті. От ағашқа, артынан құрылыс аумағына тараған. Оқиға орнына келген өрт сөндірушілер жанып жатқан асханадағы газ баллонын шығарып үлгеріпті.
«Жарылу қаупі бар газ баллоны шығарылды. Абырой болғанда есік алдынан өтіп бара жатқан жігіттер байқап қалып, азаматтық танытты. Әйтпесе, өрт дереу айналаны шарпып кетер еді», – деді Өскемен қаласы ТЖ басқармасының баспасөз хатшысы Марина Лискова.
Қазір зейнеткердің туыстары жанып кеткен заттарды жинап жатыр. Ертең үйдің шатырын жөндемек. Ал үй иесінің өзі туысқандарын паналап отыр. Күні суытқанға дейін үйді қалпына келтіруді жоспарлап отыр. Ал ТЖ басқармасының басшылығы ерлік көрсеткен Денис Пичугин мен Алишер Аянұлын марапатқа ұсынбақ.
