Бүгін, 24 желтоқсан күні, Алматы облыстық мәслихат депутаттығына кандидат Қайнар Жұмағожа мен Еңбекшіқазақ аудандық мәслихат депутаттығына үміткер Ерлан Байшеков Есік гуманитарлық-экономикалық колледжіне жиналған жұртқа «Nur Otan» партиясының сайлауалды бағдарламасын таныстырып, онда көтерілген әр мәселеге жекелей тоқталды, деп хабарлайды Neonomad.kz ақпарат агентігі.
Сайлауалды үгіт-насихат жұмыстарын жүргізіп жүрген үміткерлер аудан мен жалпы облыстағы жағдайды барынша қамтыды. Соның ішінде мемлекеттік бағдарлама аясында салынып жатқан әлеуметтік нысандарға аса мән берді.
Тұрғындар үшін «Қолайлы ауданды» құру — басты басымдықтардың бірі. Осы орайда елдегі көшбасшы партия елді мекендерді әлеуметтік игіліктермен қамтамасыз етуге, жол және көлік инфрақұрылымын, тұрғын-үй коммуналдық саланы жаңғыртуға, сондай-ақ өңірдегі қолайлы экологиялық жағдайды сақтауға бағытталған «Құтты мекен», «Ауыл — ел бесігі» сынды жобаларын іске асыруға жәрдемдеседі.
Ішкі жағдай, табиғат, экономика және нақты статистикалық көрсеткіштерді есепке алсақ, аудандағы 19 ауыл әлеуеті жоғары дамыған, тірек ауылдарға айналып отыр. Алдағы уақытта осы ауылдардың мүмкіндігін ескеріп, оларды халық пайдасына асыру жоспарда бар. Сондай-ақ, партияның келер 5 жылға айқын жоспар құрып, алдына қойған мақсатына жету жолын саралағандығы мәлім.
Аталған жоспарға сәйкес, «Nur Otan» партиясы 2025 жылға қарай маңызды деген жолдардың үлесін 4%-ға арттырады. Осы мақсатта жол сапасын кезең-кезеңімен жақсарту үшін партия 11 ауылдың орташа жөндеу жұмыстарын жүзеге асырады. Нақты қай ауылдар екені және жөндеу жұмыстары қашан қолға алынатыны да белгілі. Олар — 2022 жылы 3 ауылда: Ащыбұлақ, Алға, Қойшыбек; 2023 жылы 6 ауылда: Өрікті, Бөлек, Қайназар, Азат, Ават; 2024 жылы Түрген ауылы; 2025 жылы 2 ауылда: Космос, Базаркелді.
Жолдан өзге шешілуі тиіс тағы бір мәселе — халықтың сапалы ауызсумен қамтылуы. Жоспарға сәйкес, 2025 жылға қарай халықтың 95%-ы ауызсумен қамтылады. Бүгінде ауданда 72 ауыл орталық сумен қамтамасыз етіліп, 7 ауылда жергілікті сумен жабдықтау көзі орнатылған.
Ол үшін 19 ауылда сумен жабдықтау желілерін салу және қайта жаңарту жоспарланған: 2021 жылы — Ұлтарақов атындағы ауыл; 2022 жылы — 5 ауылда: Қайрат, Торғайбаза, Ащыбұлақ, Қазақстан, Сазы; 2023 жылы — 5 ауылда: Тауқаратұрық, Бөлек, Әймен, Қайназар, Көктөбе; 2025жылы —8 ауылда: Асы-саға, Бәйдібек би, Жаңашар, Космос, Байсеит, Рахат, Саймасай, Аманкелдіде су жүйесі жасалмақ. Ал Қызыл Шарық, Қаражота, Нұра, Түрген; Малыбай, Тескенсу, Қаратұрық, Байтерек, Қарасай, Өрікті, Қырбалтабай, Ақбастау; Ташкенсаз, Бірлік; Х.Бижанова атындағы ауылдарда сумен жабдықтау желілерін қайта жаңарту және жөндеу жұмыстары жүргізіледі.
Кездесу барысында талқыға салынған үшінші мәселе — тұрғын үй.
«Партия сайлауалды бағдарламасының негізгі міндеттерінің бірі — тұрғын үй коммуналдық шаруашылық желілері. Қазақстандықтар үшін баспана өзекті мәселе екені сөзсіз. Баспана туралы сөз қозғағанда тұрғын үйді жылумен, жарықпен жабдықтау, ауызсу жүйесіне қосу туралы сөз қозғамау мүмкін емес. Аудан тұрғындарының қолайлы тұрмысы үшін «Nur Otan» партиясы аталған мәселелермен қатар, көшелер мен аулаларды абаттандыру сияқты сұрақтардың да шешімін табады.
Дәл қазір 3566 көпқабатты тұрғын үйдің 1897-сі немесе 53,2%-ы жөндеуді қажет етеді. Бұл үшін «Nur Otan» партиясы Есік қаласындағы канализация жүйесін қайта жаңғырту және салу; блокты-модульді қазандықтардың қондырғыларын орнату; 2025 жылға дейін 10 көппәтерлі тұрғын үйде жөндеу және жаңғырту жұмыстарын жүргізу; ауылды мекенде газ тарату желілерінің құрылысын жүргізе отырып, 112 мың тұрғынның газға қол жеткізуіне жағдай жасау сынды міндеттер тұр. Бұл міндеттерге «Nur Otan» партиясымен бірге жетеміз», — деді Еңбекшіқазақ аудандық мәслихат депутаттығына үміткер Ерлан Байшеков.
Осы орайда ол алда келе жатқан сайлауға белсенді қатысуға шақырды.
«Nur Otan» партиясы үшін отбасы институтын нығайту маңызды. Осы мақсатта тұрғын үймен қамтамасыз ету үшін әрдайым назарымыздағы мәселе болады. Нақты статистикалық мәліметтерге келер болсақ, тұрғын үй алуға 2 581 адам кезекте тұр. Ал тұрғын үймен қамтамасыз ету деңгейі 17,2 шаршы метрге дейін жақсарды. Партиямыз бұл көрсеткішті 2025 жылға қарай 18,4 шаршы метрге дейін жеткізуді мақсат етіп отыр. 2025 жылға қарай көпқабатты 9 тұрғын үй салынып бітеді. Сонда барлығы 350 пәтер болмақ. Тоғыз үйдің сегізі Есік қаласында 290 пәтерлік үй болса, Шелек ауылында 60 пәтерлі бір үй салынады. Ал 6 ауылда 487 гектарды инженерлік инфрақұрылыммен қамтамасыз ету жоспарланған. Бұл ауылдар: Ақши, Қайназар, Алға, Шелек, Өрікті және Бәйдібекби» , — деді Алматы облыстық мәслихат депутаттығына кандидат Қайнар Жұмағожа.
Бағдарламадағы басым бағыттардың бірі экологиялық ахуал болып, кездесу барысында қоқыс мәселесі де назардан тыс қалмады. Кездесу соңында тұрғындар сайлауалды бағдарламаға енген мәселелер мен олардың шешу жолдары көңілдерінен шығатынын айтып, үміткерлерге сәттілік тіледі.
Сайлауалды үгіт-насихат бағытындағы материалдар «Nur Otan» партиясы Еңбекшіқазақ аудандық филиалының сайлау қорынан төленеді.
