Алматы қаласы әкімі Бақытжан Сағынтаевтың штаттан тыс кеңесшісі болып тағайындалған Мейрамбек Беспаев сахнадан кетуінің себебін түсіндірді, деп хабарлайды Neonomad.kz ақпараттық агенттігі Ревю бағдарламасына сілтеме жасап. 

«90-ға келгенше сахнада өлең айтып тұрамын деп ойламаймын. Төреғали секілді бауырлар бар кезде сахнаны қорықпай беріп кете аласың. Өзім қуаныштымын. Ықпал ететін жерге өз саласының адамы барса, бұл құба-құп нәрсе. Өйткені жақсы түсінеді, жаны ашиды. Билікте әр саланың жанашыры отырса, шынымен де алға жылжуға болады. Жас әншілерді, әсіресе дәстүрлі әншілерді қолдау керек. Қазақы әншілерді жүрегіммен қолдаймын», – дейді ол.

Сонымен қатар, Беспаев жаңа қызметінде қандай жетістіктерге қол жеткізгенін айтты.

«Республикалық сарайдың маңында қаншама проблема бар. Ақырындап шешіп жатқан секілдіміз бәрін. Ойымызды тыңдап жатыр, соған рақмет айтамын. Орынтақ, мансап қуып жүрген адам емеспін мен. Өнер саласына көмектескім келді. Сондықтан ұсынысты қабыл алдым. Өнердің төңірегінде біраз өзгерістер болып жатыр. Әлі де болады. Концерт беріп жатқан жастар мұны жақсы біледі. Бірақ ол туралы айтпай-ақ қояйыншы, «көмектесті, анау-мынау» деген артық сөздің маған керегі жоқ», – дейді ол.