Қарағанды облысында мемлекет алдындағы қарызы 65 млн теңгеге жеткен шенеуніктің кім екені анықталды, деп хабарлайды Neonomad.kz ақпараттық агенттігі Литер басылымына сілтеме жасап.
10 жылдан бері салық төлемей жүрген адам облыстық әкімдікте қызмет етеді екен. Салықтық қарызы 65 млн теңгеге жеткен. Оның 37 млн теңгесі нақты қарызы, ал 28 млн теңгесі қарыздың үстіне қосылған айыппұл. Мұны борышкердің өзі мойындап отыр.
Қарағанды облысы Бұқар жырау ауданы әкімдігінің бас маманы кезінде 37 гектар жерді өз меншігіне алып алған. Алайда 10 жыл өтседе ер мемлекеттік қызметкер жерді тиімді игеруге асықпаған.
«Мен қайдан білейін, жерге мұндай үлкен салық төлеу керектігін. Маған жылына 5,5 миллион теңге төлеу керектігі туралы түбіртек қағаз келіп тұрды. Ал мен секілді мемлекеттік қызметкерде ондай ақша қайдан болсын?», – дейді ол.
Кезінде Жер қатынастары бөлімінің бастығы болған ол 37 гектар жерге не саламын дейді.
«37 гектар жерге мен не саламын? Ол зауыт немесе өнеркәсіп салуға арналған орын. Қазір бұл іске сот орындаушылары кірісіп жатыр. Жер телімі тәркіленді. Мен оны сатуға келісімімді беретін қағаз өткіздім», – дейді әкімдік қызметкері.
