Сайлаудың өтуіне санаулы күндер қалды. 10 қаңтарда қазақ елі тағы бір үлкен тарихи таңдау жасап, саяси өмірінде дамудың даңғыл жолын айқындайды. Осыған байланысты «Nur Otan» партиясы Тұрар Рысқұлов аудандық сайлауалды штабының төрағасы, аудандық партия филиалы төрағасының бірінші орынбасары Қанат Арыстанбековтен сайлауалды үгіт-насихат жұмыстарының қазіргі барысы жөнінде сұрап-білген едік.
– Сайлауалды үгіт-насихат жұмыстары қалай жүріп жатыр?
– Бүгінгі таңда сайлауалды үгіт-насихат жұмыстары жан-жақты жүріп жатыр. Ауданымыздан облыстық мәслихат депутаттығына 3, ал аудандық мәслихат депутаттығына 28 кандидат бар. Барлығы да «Nur Otan» партиясының сайлауалды бағдарламаларын халыққа кеңінен жеткізу мақсатында ауыл-ауылдарда үгіт-насихат жасап жүр. Бұл жұмыстардың барлығы біздің алдын ала жоспарланған жүйелі кестеге сәйкес түрлі форматта күнделікті өткізілуде. Қазіргі жағдайды бәріңіз көріп-біліп отырсыздар. Бүкіл әлем жұртын алаңдатып қойған пандемия біздің өмірімізге де өз ережелерін енгізіп, белгіленген шектеулерін шегелеп жатыр. Яғни, бұрынғыдай халықты көп жинап, арқа-жарқа әңгімелесіп отыруға мүмкіндік жоқ. Дегенмен, қатар отырып сұхбаттаса алмасақ та технологияның дамыған заманында қолымыздағы телефонмен-ақ еш кедергісіз, кез келген жанмен онлайн-кездесу ұйымдастыра аламыз. Бүгінде біздің сайлауалды насихат жұмыстарын жүргізу кестемізге сәйкес «Кандидатқа сұрақ қой» акциясы көбіне-көп осы онлайн-кездесулер түрінде әлеуметтік желілердің тікелей эфирі мен видеоконференцияларға арналған қосымшаларда өткізіліп келеді. Сайлаушылар сұрақтарын еш кедергісіз қойып, ұсыныс-тілектерін жеткізіп жатыр. Яғни мұнда туындайтын қиындық жоқ.
– Онлайн-кездесулерге тоқталып өттіңіз, ал қазіргі карантин режимінде бетпе-бет кездесулер қалай өтуде?
– Әрине, адамның өмірі мен денсаулығы біз үшін қымбат. Сондықтан қазір де карантиндік шектеулер мен санитарлық талаптар қатаң сақталады. Аудандық, облыстық санитарлық дәрігерлердің бекітіп берген ережелері аясында, санитарлық-эпидемиологиялық талаптарды қатаң сақтай отырып, әлеуметтік қашықтық пен бетперде режимін қадағалап, адам санын шектеумен бетпе-бет кездесулер өткізіп келеміз. Онда да кездесу болатын орынның сыйымдылығы, яғни әлеуметтік қашықтықты сақтауға мүмкіндіктің бар-жоғы ескеріледі. Кездесулер көбіне сыртта, таза ауада өтеді. Сонымен қатар жиынның уақытын ұзаққа созбай, қысқа-нұсқа өтуін талап етеміз. Кандидаттар мен еріктілерге санитарлық-эпидемиологиялық талаптар түсіндіріліп, оны қатаң сақтау қажеттігі үнемі айтылады. Сондықтан сақтық мәселесі басты назарда.
– Сенімді өкілдер мен еріктілер тобы сайлауалды үгіт-насихат жұмыстарын жүргізіп жүргенін білеміз. Осы бойынша тоқталып өтсеңіз..
– Иә, осы сайлауға орай бүгінде ауданымызда 105 сенімді өкіліміз бен 35 ерікті сайлауалды үгіт жұмыстарын жасап жүр. Олар елді мекендерді аралап, біздің алдын ала келісімшарт жасасқан қоғамдық орындарда партияның сайлауалды бағдарламаларын таныстыратын, партиямызды насихаттап, халықты сайлауға қатысуға шақыратын ақпараттық брошюралар мен хабарламалар таратып, белгіленген жерлерге іліп жүр. Сенімді өкілдеріміз бен еріктілердің барлығы да – партияластарымыз. Еріктілер – «Jas Otan» жастар қанатының мүшесі, белсенді жастар. Үгіт-насихат жұмыстарын жүргізіп жүрген олардың барлығын да «Nur Otan» партиясының имидждік киімдерімен қамтыдық. Бұл да насихаттың бір түрі деуге болады. Мұндағы мақсат – тұрғындар сайлауалды үгіт-насихат жұмыстарын кімдердің, яғни қай партияның жүргізіп жүргенін көрсін, партияны танысын, білсін деген мәселе.
– Үгіт – насихат жұмыстары кезең-кезеңмен жүріп жатыр. Оның ерекшелігі қандай?
– Оның негізгі ерекшелігі – негізгі жұмыстар біздің ауданымыздың сайлауалды бағдарламасын халыққа кеңінен таныстыру. Басымдық аудандық бағдарламаға беріледі. Яғни жергілікті жерде қолға алынатын жұмыстар мен күрделі мәселелерді шешу жолдары көрсетілген бес жылдық бағдарламаны халыққа жеткізу. Ол үшін үгіт-насихат жұмыстарын жүргізушілер көбіне «Есіктен есікке» акциясымен әр үйге кіріп, тұрғындарға бағдарламаны түсіндіруді қолға алған. Бүгінде ауданымыздағы сайлаушылардың 70 пайызын қамдытық. Әлі де болса, партиямыздың сайлауалды бағдарламаларын азаматтарымызға жан-жақты жеткізіп, толыққанды түсіндіру үшін қызу жұмыс жүргізілуде. Одан бөлек кандидаттар «канвассинг» өткізіп жатыр. Бұл да насихат жұмысының бір түрі.
– Үгіт-насихат жұмыстарын жергілікті және республикалық БАҚ-тарда да жүргізіп келесіздер және кандидаттардың әлеуметтік желілер арқылы үгіт-насихат жұмыстарын белсенді жүргізіп жатқанын көріп жүрміз…
– Иә, биылғы сайлаудың бір ерекшелігі «Nur Otan» партиясының сайлауалды қорынан қаржы бөлініп, бүгінде 5 сайтпен және 3 аудандық газетпен келісім шартқа отырдық. Олар партиямыздың сайлауалды бағдарламасын, кандидаттардың өткізіп жатқан іс-шараларын, сенімді өкілдеріміз бен еріктілердің атқарып жатқан сайлауалды үгіт-насихат жұмыстарын жариялап, халық арасына кеңінен таралуына өз септігін тигізіп отыр.
Әлеуметтік желілер бүгінде үгіт-насихат жүргізуде негізгі құралдардың бірі болып отыр. Өйткені халықтың басым бөлігі – әлеуметтік желілердің қолданушылары. Кез келген жаңалық пен оқиғаны, негізінен, қолымыздағы смартфон мен компьютерден оқып-білеміз. Сондықтан да әлеуметтік желілерде үгіт-насихат жұмыстарын жүргізу басқалардан алда тұрғаны түсінікті. Қазіргі уақытта әрбір кандидат өткізген іс-шараларының барлығын әлеуметтік желілердегі жеке парақшаларында жариялап отыр. Әрі әр жариялымы туралы сайлауалды штабқа есеп береді. Осылайша біз кандидаттардың белсенділік көрсеткішін анықтап, рейтинг шығарып отырмыз.
– Бұл рейтинг кандидаттардың үгіт-насихат жұмыстарын белсенді жүргізуін қадағалау үшін жасала ма? Әлде рейтинг көрсеткіштері сайлауда үміткерлерге қандай да бір артықшылық бере ме?
– Әрине, қазіргі жасалып жатқан жұмыстардың барлығы маңызды. Рейтинг көрсеткіштері қай кандидаттың белсенді екенін, халықпен қаншалық жұмыс істегенін, жергілікті жердің жай-жапсарынан қаншалық хабардар болғанын, аудандағы мәселелердің мән-жайын түсінген-түсінбегені және тағы басқа да осы сияқты критерийлердің жауабы болады. Сондықтан рейтинг бағасы әр кандидат үшін өте маңызды. Кандидаттармен қатар мұндай есепті еріктілер де күнделікті жібереді. Бұл олардың жұмыс жүргізіп жатқанының көрсеткіші болмақ.
Жалпы алғанда, ауданымыздағы сайлауалды үгіт-насихат жұмыстары қарқынды жүруде. Ауданымызға Қазақстан Республикасы Парламенті Мәжілісіне және облыстық мәслихат депутаттығына кандидаттар келіп, кездесулер ұйымдастырып жатырмыз. Бұл біздегі үгіт-насихат жұмыстарының жүйелі жүргізіліп отырғанын білдіреді. «Nur Otan» партиясының халыққа етене жақын, халықтың мұң-мұқтажын шешетін, билікпен бірлесіп, тұрақты, жүйелі жұмыс жасайтын партия екенінің бір айғағы. Аудан тұрғындарын «Nur Otan» партиясына дауыс беруге шақырамын. Біз біріксек, алынбайтын қамал жоқ! Сондықтан 10 қаңтарда азаматтық белсенділік танытытып, өз болашағымыз үшін дауыс берейік!
«Nur Otan» партиясы Т.Рысқұлов Сайлауалды штабының басшысы Қ.Арыстанбеков
Сұхбаттасқан тілші Ж.Базылбеков
Сайлауалды үгіт-насихат бағытындағы материалдар «Nur Otan» партиясы Жамбыл облысы Рысқұлов аудандық филиалының сайлау қорынан төленеді.
