Жаңадан тағайындалған Алматы әкімі Бақытжан Сағынтаев Instagram, Facebook және Twitter желілерінде тіркелді, деп хабарлайды Neonomad.kz әкімдіктің қоғаммен байланысты қызметіне сілтеме жасап.
Сағынтаевтың бірінші посты – ол Алматы тұрғындарына жолдауы болды. Ол Алматы әкімі ретінде өзінің жауапкершілігін толық сезінетінін атап өтті.
«Алматы әрқайсымыздың жүрегімізден ерекше орын алған қала, Алматыға деген әр қазақстандықтың ықыласы ерекше. Менің басты мақсатым – Алматының әр тұрғыны берекелі өмір сүретін, қауіпсіз де қолайлы, заманға сай мегаполиске айналдыру. Біз оған тек бірге, тізе қосып еңбек ету арқылы жете аламыз», – деді Сағынтаев.
Оның сөзінше, барлық түскен ұсыныстар мен шағымдарды дер кезінде назарға алу маңыздылығын атап айтты.
«Қаланың проблемалары мен даму стратегиясын Сіздермее бірге ашық талқылағым келеді. Барлығымыздың тағдырымызбен байланысты маңызды шешімдерді әзірлеп, қабылдау кезінде сіздердің қолдауларыңыз мен үшін маңызды. Ақылдаса отырып, бірге жұмыс істейік!», – делінген әкімнің жолдауында.
Еске сала кетсек, Бақытжан Сағынтаев Алматы қаласының әкімі болып 28 маусымда тағайындалған болатын.
