Астаналық полицейлер қайтыс болғандардың мәліметтерін жерлеумен айналысатын агенттіктерге сатып отырған, деп хабарлайды Neonomad.kz ақпараттық агенттігі Informburo.kz сайтына сілтеме жасап. 

Бұл туралы астаналық Сыбайлас жемқорлыққа қарсы іс-қимыл агенттігі департаменті хабарлады.

Департаменттің мәліметінше, полицейлерден ақпарат алған соң, агенттік қызметкерлері қайтыс болғандадың туыстарына хабарласқан.

«Олар жұрттың қайғысына қарамай, өздерінің қызметін ұсынған. Бірден бұл агенттіктер қайғыға душар болған отбасы туралы ақпаратты қайдан алды деген сауал туындайды», -деді брифинг барысында Анар Жарова.

Астаналық жемқорлыққа қарсы қызмет тексеру жүргізген. Нәтижесінде «Алматы» және «Сарыарқа» аудандарындағы кезекші бөлімнің тоғыз қызметкері жұмыстан шығарылды. Олардың басымы полиция майоры қызметіндегілер.

Түсіндіру жұмысын дұрыс жүргізбеген басшылар тәртіптік жауапқа тартылды.

Анар Жарова мұндай жағдай тек астанада ғана емес, өзге өңірлерде де кездесетінін атап өтті. Жемқорлыққа қарсы қызметке 1424 нөмірі арқылы хабарласуға болатынын айтты.