Атырау перзентханасында сәби шетінеп кеткеннен соң Денсаулық министрлігі медициналық ұйымдарға тексеру жүргізген болатын. Нәтижесі жарияланды, деп хабарлайды Neonomad.kz ақпараттық агенттігі Nur.kz сайтына сілтеме жасап. 

Денсаулық сақтау министрлігі тауарлар мен көрсетілетін қызметтердің сапасы мен қауіпсіздігін бақылау комитетінің төрағасы Людмила Бюрабекованың мәліметінше, сәбилер тірі туылған. Алайда өмірінің алғашқы жеті күнінде шетінеп кету жағдайы анықталған.

«Сараптама нәтижесінде сәбилердің тірі туып, өмірінің алғашқы жеті күнінде шетінеп кеткені анықталды. Бұған дейін 277 жағдай анықталғанын айтқанбыз, бірақ қосымша материалдарды тексере келе осындай 282 жағдай орын алғаны белгілі болды.

Бұл сәбилер шынымен тірі туған, бірақ алғашқы жеті күн ішінде туа бітті жүрек ақауы және басқа себептерден шетінеп кеткен. Бұл сандар бала өлімі көрсеткішіне әсер етеді», – деді ол.

Айта кетейік, облыстың бас акушер-гинекологы пара беремін деп ұлттық бюро қызметкерлерінің назарына ілінген. Осы іс бойынша телефонын тыңдау кезінде оның тағы бір қылмысы әшкереленген. Яғни,базаға өлі туды деп тіркелген сәби тірі болып шыққан. Директордың бұйрығы бойынша нәрестені тоңазытқышқа салып қойғанын жаздық.

Кейін белгілі болғандай, дәрігерлер электрондық мәліметтерді түзетуді қиынсынған үшін осындай қадамға барған. Оқиға 30 қыркүйекте белгілі болды. Бұл туралы денсаулық сақтау вице-министрі айтып берді.

Жаңа туған сәбидің анасы сол күні болған жағдайды еске алды. Сәби 24 жастағы келіншектің тұңғышы екенін жаздық.