Алматы облысында балабақша тәрбиешісі балаларды ұрып, қорқытқан, деп хабарлайды Neonomad.kz ақпараттық агенттігі Tengrinews.kz сайтына сілтеме жасап.
Тәрбиеші балаларды ұрып жатқан сәті видеоға түсіп қалған. Оны
kris_p_brothers_official Instagram-паблигі жариялады.
«Ниет-ай» балабақшасы, Байсерке ауылы. Новостройская көшесі, 5а, Гаражный тұйық көшесі. Кіші топ. Зорлық-зомбылықты қолдану, балалармен қатыгез қарым-қатынас. Атап айтқанда, ұру және қорқыту. Құзыретті органдардың назары ауып, мәселе шешімін тапсын. Адамдар, өз балаларыңызды сақтаңыздар», – делінген жазбада.
Бұл фактіге байланысты Алматы облысының әкімдігі қызметтік тексеру жүргізіп жатқанын хабарлады.
«Бұл оқиға Байсерке ауылындағы жекеменшік балабақшасында болған. Қазіргі уақытта аудандық комиссия құрылды, оған әкімдік, білім беру бөлімі және басқа да мүдделі органдардың қызметкерлері кірді. Бейнежазба алынып, балабақша басшысы мен жұмыс ауысымында болған қызметкерлерден түсініктеме алынады. Тексеру жүргізіледі. Ата-аналармен әңгіме жүргізіледі. Барлық жағдайлар комиссияның жұмысы барысында нақтыланатын болады. Тексеру қорытындысы бойынша тиісті шаралар қабылданатын болады», – деп хабарлады әкімдіктің баспасөз қызметі.
