Ресей үкіметі эпидемия кезінде қажетті медицналық өнімдерді – маскаларды, бахилаларды, резіңке қолғаптарды, қалаттарды, арнайы киімдерді шетелге шығаруға тыйым салды. Үкімет қаулысы 4 наурызда жарияланды, деп хабарлайды Neonomad.kz ақпарат агенттігі.
Тыйым 2020 жылдың 1 маусымына дейін енгізілді. Мұндай шешім коронавирус таралған жағдайда медициналық өнім тапшы болмау үшін қабылданған. Тыйымның өндірістік партияларға ғана қатысы бар, тізімдегі заттардың бір данасын жеке мақсатты пайдалану үшін шетелге алып шығуға болады.
4 наурызда таңертең тіркелген мәлімет бойынша, COVID-19 коронавирусын 92801 адам жұқтырды. 3201 адам қаза тапты. Қытай, Оңтүстік Корея, Иран және Италияда жұқпалы ауру көп таралған. Вирус әлемнің 76 елінде тіркелді.
Мәскеуде вирус жұқтырды деген күдікпен ауруханаға түскен екі науқасты қала шетінде тексеріп жатыр. Ресми мәлімет бойынша, қалада коронавирус жұқтырған бір науқас бар, тағы үшеуі Қазандағы ауруханада жатыр.
