29 маусымда «Астана Арена» стадионында әлемге танымал болған қазақстандық әнші Димаш Құдайбергеннің шоуы өтеді. Елорда да болатын үлкен концертте қоларбадағы би спортынан әлем чемпионы Қарлығаш Тынабекова өнер көрсетеді, деп хабарлайды Neonomad.kz Sputnik Казахстан порталына сілтеме жасап. 

31 жастағы биші Қарлығаш Шымкент қаласының тумасы. Ол бала кезінен ұлттық бимен қызыға айналысқан. Мектепті аяқтаған соң, ата-анасымен астанаға көшіп келеді.

Осыдан 10 жыл бұрын Қарлығаштың өмірінде қайғылы жағдай болды. Апатқа ұшырап, мүгедек жандардың қатарын толықтырды. Қайта қалыпқа келу процессі, өзінің мүмкіндігі шектеулі екендігін қабылдағы келмеген қыз талай қиын сәттерді бастан кешкен. Тек осыдан алты жыл бұрын, мүгедектерге арналған қоларбадағы бимен айналыса бастағанда ғана өзін толыққанды адам ретінде сезіне бастаған.

«Басында мен екі аяқты сезбей, қалай билеуге болады деп ойлаушы едім. Осы қиын кезеңді бастан кешкен соң ғана түсіндім – тек билеу керек. Ең қиыны бастау. Өзіңе деген сенімсіздікті жеңіп, залға келу. Би арбасын маған ардагер парабишілер беріп жіберді. Ол қарапайым арбадан тым өзгеше. Биге арналған арабада өзімді ұшып жүргендей сезінемін», – дейді қоларбадағы би спортынан әлем чемпионы.

Қазақстанның еңбек сіңірген тренері, заманауи және спорт биі бойынша республикалық федерацияның негізін қалаушысы Әлия Тусупбекованың арқасында Қарлығаш би әлемін бағындыруда. Тренерінің сабырлығы мен биге деген шынайы сезімінің арқасында үлкен жетістіктерге қол жеткіздім деп ойлайды Қарлығаш.

2017 жылы Қарлығаш әлем чемпионы атағын алған. Қазір қарашада Германияда өтетін жарысқа дайындалуда.

Наурыз айында режиссёр Николай Подошва-Захаров Қарлығашты телевизиялық премияға қатысуға шақырады. Сол кездегі режиссёрмен танысқан сәтін Қарлығаш тағдыр деп санайды. Телевизиялық қойылымнан соң режиссёр Қарлығашты Димаштың «Арнау» шоуында өнер көрсетуге шақырған.

«Біз шоуға бір айдан бері дайындалудамыз. Репетициямыз кешкі сағат 22.00 басталып, түнгі 02.00 дейін жалғасады. «Любовь уставших лебедей» әніне бағышталған номерде Димаш пен менен басқа тағы 9 биші өнер көрсетеді. Номер өте әдемі, романтикалы. Биіміз арқылы аққулардың махаббатын көрсетуге тырысамыз», – дейді әлем чемпионы Қарлығаш.