Мәжіліс жаңа құрылатын экология, геология және табиғи ресурстар министрлігінің басшысы етіп Мағзұм Мырзағалиевтің кандидатурасын мақұлдады, деп жазады Neonomad.kz ҚР Мәжілістің сайтына сілтеме жасап.
Премьер-Министрдің тапсырмасы бойынша кандидатты Премьер-Министр Кеңсесінің Басшысы Ғалымжан Қойшыбаев таныстырды.
Мәжіліс комитетінің мүшелері кандидатқа бірқатар сұрақтар қойды.
Қазақстан Республикасы Парламенті Мәжілісі Экология мәселелері және табиғат пайдалану комитетінің отырысының қорытындысы бойынша «Қазақстан Республикасының Парламенті және оның депутаттарының мәртебесі туралы» Қазақстан Республикасы Конституциялық заңының 22-1-бабына сәйкес Қазақстан Республикасының Премьер-Министрі ұсынған Мағзұм Маратұлы Мырзағалиевтың кандидатурасы Экология, геология және табиғи ресурстар министрі лауазымына тағайындау үшін ұсынылды.
Мағзұм Мырзағалиев 2014 жылдың тамызынан бастап энергетика министрінің орынбасары қызметін атқарады. Оған дейін ол мұнай және газ министрлігінің вице-министрі, меңгеруші директор, «ҚазМұнайГаз» ұлттық компаниясы Басқармасы төрағасының орынбасары болды.
Сонымен қатар, бүгін Мәжіліс депутаттары мәдениет және спорт министрінің кандидатурасын қарастырды. Осы қызметте жүрген Арыстан Мұхамедиулының орнына Ақтоты Раймқұлова тағайындалуы мүмкін.
