Сарыағаш қаласында кәмелетке толмаған қызды екі ер адам зорлап кеткен, деп хабарлайды Neonomad.kz ақпараттық агенттік Zakon.kz сайтына сілтеме жасап. 

Бұл туралы адвокат Құрманғазы Мүсір мәлімдеді. Оның сөзінше, 16 жастағы қыздың тамағына пышақ тақап қорқытып, зорлап тастаған.

«Екі ер адам Audi көлігіне мініп, ізін суытқан. Кеше кәмелетке толмаған қыздың анасы Сарыағаш полиция бөліміне арызданғанда, олар кеш кешке дейін арызды қабылдамай, әуреге салған. Арызды қабылдамауларына олардың оралмандар және әлі де Қазақстан Республикасының азаматтығын алмағандарын алға тартқан. Ақыры зардап шегушінің анасының қазымырлығының арқасында шағым ақыры өткен полицияға (анасының айтуы бойынша)»,- деп жазды Құрманғазы Мүсір Facebook-тегі парақшасында.

Зардап шеккен тараптың айтуынша, күдіктілердің бірі – бұрынғы полиция қызметкері.

Осыны айтқан адвокат, облыстық полиция басшылығынан істі жеке бақылауға алуын сұрады. Қылмыстық іс бойынша күдіктінің бір адам екені хабарланды. Алайда полиция департаменті күдіктінің ішкі істер органдарында істегені туралы ақпаратты жоққа шығарып отыр.

«Өзбекстан азаматының 23 қазандағы арызына сәйкес, шағым түскен күні ҚР Қылмыстық кодексінің 120-бабы 2-бөлігі бойынша сотқа дейінгі тергеу ісі қолға алынды. Сол күні кешке полиция қызметкерлері күдіктіні анықтап, ұстады. Қазір ол қамауда. Соттық-медициналық сараптамалар тағайындалды. Сотқа дейінгі тергеу кезінде барлық жағдайлар анықталатын болады. Екінші күдікті туралы ақпарат расталған жоқ», – дейді полициядағылар.