Мемлекет басшысы Қасым-Жомарт Тоқаев бүгін болып жатқан сайлаудан кейін Парламентте көп саяси партия өкілі болғанын қалайтынын жеткізді, деп хабарлайды Neonomad.kz ақпарат агенттігі.
«Әр сайлау — азаматтық батылдыққа маңызды емтихан. Біздің Парламентте әр түрлі партия болады деп қатты үміттенемін. Еліміздің болашағы, тағдыры туралы Парламентте пікірталастар болуы керек, бұл бірінші. Екіншіден, парламент өте сапалы заңдар қабылдауы керек», — деді Тоқаев Нұр-Сұлтандағы Оқушылар сарайында дауыс бергеннен кейін журналистер алдында сөйлеген сөзінде.
Сонымен қатар, Президент мәжіліс депутаттары сайланғаннан кейін Үкімет заң бойынша отставкаға кетуі тиіс екенін айтты және Қазақстандағы наразылық білдіруге қатысты пікір білдірді.
«Біздің заңнамаға сәйкес, үкімет отставкаға кетуі тиіс. Мен сайлау аяқталғаннан кейін парламентке барып, фракция жетекшілерімен, депутаттардың жаңа құрамымен премьер-министр мен үкімет мүшелерінің кандидатурасын ақылдасамын», — деді Тоқаев мәжіліс сайлауында дауыс берген соң.
Бұған дейін Қазақстан прездиенті Нұр-Сұлтандағы Оқушылар сарайы ғимаратында орналасқан сайлау учаскесінде дауыс берді. Мемлекет басшысы елде сайлауға байланысты митинг бола қалған жағдайда, полиция қызметкерлері заңға сәйкес әрекет ететінін мәлімдеп, наразылыққа қатысушылар қудаланбайды деп сендірді.
