Айсәуле Бақытбек Қазақстандағы зорлауға қатысты берілетін бас бостандығынан айыру мерзімімен еш келіспейтінін жеткізді. Сондай-ақ, ол өз елінде жүріп өзін қаншалықты қорғансыз сезінетінін айтты, деп хабарлайды Neonomad.kz ақпарат агенттігі.

«Қазақстандағы зорлауға қатысты заңды өзгерткеніне 20 жыл уақыт толады. Көп жыл бұрын оны ауыр қылмыс түрінен орташа ауыр қылмыс түріне ауыстырған болатын. Меніңше, бұл нағыз айуандық. Жуырда ісі қаралған қосылып бір әйелді зорлаған жолсеріктер туралы естіген шығарсыздар. Осы үшін оларға 2,5 жыл берді. Яғни олар мерзімінің жартысын өтеп болған соң, шартты түрде босатылады. Екеуі жабылып зорлап тұрған кезде қалайша бұлай болуы мүмкін», – дейді Айсәуле Бақытбек.

Мұнымен қатар, ол басынан өткен жайсыз оқиға туралы айтып берді. Бұл оқиғасы полиция қызметкерімен байланысты.

«Мен де көп адам секілді органдарға деген сенімімді жоғалттым. Олардың маған оғаш қылық көрсеткен кезі болған. Бірде мені полиция қызметкерлері ұстады. Олар мені еш себепсіз тоқтатты. Бұдан кейін көлікке отырғызып, маған қылмыңдай бастады. Бұл оқиға бірнеше жыл бұрын болды», – дейді Баян Алагөзованың қызы.

Полицейден қорғануға оған сол уақытта шетелде жүрген жігіті көмектескен-ді. Айтуынша, полиция қызметкері қазіргі күйеуі, сол кездегі жігітінің дауысын ести салысымен жіберген. Осы орайда ол Елбасы Нұрсұлтан Назарбаев пен ІІМ министрінен көмек сұрады.