Қордайдағы қақтығысқа қатысты 90 қылмыстық іс қозғалған. Соның ішінде 11-і адам өлтіруге байланысты. Ал нақты қанша адам құрықталғаны жайында Ішкі істер министрлігі әзірге ақпарат бермей отыр, деп хабарлайды Neonomad.kz ақпарат агенттігі КТК арнасына сілтеме жасап.
Вице-министр Марат Қожаевтың айтуынша, қылмыстық істің саны артыпты. Бүгінде 100 шақты адамнан жауап алынған. Олардың әрқайсысының бұл іске қатысы бар-жоғы анықталады. Егер заң бұзушылық әрекеттері дәлелденсе, қылмыстық іс қозғалады. Ал нақты қанша адам ұсталып, қаншасы жауапқа тартылғаны хақында вице-министр кейінірек мәлімдеуге уәде етті. Негізі мұндай ауқымдағы істі толықтай тергеп-тексеруге екі айдай уақыт бөлінеді. Егер қажет болса, уақыт тағы да созылуы мүмкін.
«Тәртіпсіздіктерге ұласқан іс әрекеттерге барған азаматтар ұсталды. Үшеуіне қатысты қылмыстық іс қозғалып, сотқа жіберілген. Сондай-ақ, қарияға қол көтергендер де құрықталды. Ал осы дауды ушықтырушыларға қатысты ақпаратты кейінірек береміз», – дейді ҚР Ішкі істер министрінің бірінші орынбасары Марат Қожаев.
