Арыс қаласының әкімі Мұрат Қадырбек басшылық қызметте жүрген жылдары ешкімге заңсыз жер сатпағанын айтты. Осы орайда ол «Мен не істеп, не қойғанымды жақсы білемін» деп ақталды, деп хабарлайды Neonomad.kz ақпарат агенттігі Stan.kz сайтына сілтеме жасап.

Арыс әкімі әскери бөлімге жақын орналасқан аумақта жерлердің заңсыз сатылғанына қатысты сұраққа жауап беріп отырып қолында нақты мәлімет жоқ екенін жасырмады.

«Ең алдымен, Арыстағы заңсыз берілген жерлер туралы мәлімет менде жоқ. Екіншіден, осы күнге дейін «Көктем-1» шағын ауданында ешкімге жер беріп көрген емеспін. Өзімнің не істеп, не қойғанымды жақсы білемін. Біреуге жерді заңсыз беріп қойдым деп айта алмаймын.

Жер тек белгілі бір тәртіп бойынша ғана берілуі тиіс. Бұл сөзбен толықтай келісемін. Жалпы онда жерлер 2007 жылдан бастап беріле бастаған. Қолымдағы мәліметке сәйкес, осы жылы қаланың бас жоспары бекітіліп, шекаралары белгіленген. Осы шекара негізінде жерлер беріліп, үйлер түсе бастады», – деді Мұрат Қадырбек.

Әрі қарай әкім бұл мәселенің анық-қанығын құзырлы органдар анықтап, қорытынды шығаратынын, ал жердің заңсыз берілуіне өзінің еш қатысы жоқ екенін қайталады.

Еске салсақ, 24 маусым күні Арыста әскери бөлімдегі оқ-дәрі қоймасында жарылыс болып, салдарынан қала тұрғындары қауіпсіз аймаққа эвакуацияланды. Бұл жағдайды президент Қасым-Жомарт Тоқаевтың өзі бақылауға алып, оқиға орын алған қалаға арнайы келді. Кейінірек қорғаныс министрі Нұрлан Ермекбаев тілшілерге берген бір сұхбатында жарылысты табиғи апат деп айтып, елдің сынына қалды.