Қазақстанның тұңғыш президенті, Қауіпсіздік кеңесінің төрағасы Нұрсұлтан Назарбаев 8 сәуір күні халыққа үндеу жасап, қазіргі жағдайда популистік және адамдарды бір-біріне қарсы қоятын сөздерден аулақ болуға шақырды, деп хабарлайды Neonomad.kz ақпарат агенттігі.
Елбасы коронавирус пандемиясы мемлекеттер аралық мәміленің форматын өзгертеді деп есептейді. Ол кеше ғана өзара дұшпан болған, санкциялар енгізген елдер бүгін бір-біріне қол созып, жәрдем беріп жатыр деп мысал келтірді.
Назарбаев пандемиядан жағдай оңай болмайтынын, бірақ ел бұл қиындықтан шыдамдылық, тұрақтылық пен күш-жігерінің арқасында шығатынын жеткізді. Оның айтуынша, бұл үшін қаржы, материалдық ресурстар, техника, азық-түлік қоры жеткілікті.
«Қиын күндері әлем аралап көмек сұрамай, елдің болашағы үшін бірнеше жыл бұрын Ұлттық қор және алтын валюталық резерв түзегенбіз. Қазір қорда 90 миллиард АҚШ доллары бар. Егер бұл қаражатты жөнімен және саналы қолдансақ, бұл басымызға түскен қиын күндерден шығып кетуге жол ашады», – деді Назарбаев.
Қазақстанда 8 сәуір күнге мәлімет бойынша коронавирус жұқтырған адамдардың саны 709-ға жетті, 51 адам айықты, алтауы көз жұмды.
