Арыс қаласын эвакуациялау кезінде көптеген тұрғын ерлік көрсетті. 19 жастағы Асқар Әбдіқалық жарылыс болған кезде балабақша балаларын құтқаруға көмектескен. Жас жігіт сол сәтте 80 баланы қаладан қауіпсіз жерге алып шыққан, деп хабарлайды Neonomad.kz ақпарат агенттігі 24.kz сайтына сілтеме жасап.

Дәл қазір Асқар Әбдіқалық қатты қорыққанын жасырмайды. Десе де сол сәтте бар ойы балаларды құтқаруда болған екен. Жарылысты ести салысымен «Газельге» отырып, бірден балабақшаға келген.

«Біз балаларды «Газельге» отырғызып жатқан кезде снаряд тура қасымызға келіп түсті. Барлығы қатты қорықты. Бірақ уақыт секундтап өтіп жатты. Бізге балаларды жылдам құтқару керек болды», – дейді ол.

Асқар бүлдіршіндерді Шымкент жаққа қарай алып барған. Арыстың мыңдаған тұрғыны да осы бағытта жүрмек болды. Осының салдарынан кептеліс ұзындығы километрге созылды. Сол себепті 19 жастағы жігіт маршрутты өзгертуді жөн көреді.

«Қаладан Шымкентке қарай бағыт алған болатынмын. Ал ол жақта кептеліс. Сосын Шардараға қарай жүремін деп шешім қабылдадым», – дейді ол.