Жуырда ғана Мәжіліс депутаты болып тағайындалған актер Нұрлан Әлімжанов өзінің жаңа қызметіне, әріптестеріне қатысты пікір білдірді, деп хабарлайды Neonomad.kz ақпараттық агенттігі Sputnik Қазақстан сайтына сілтеме жасап.
Депутаттық қызметін жан-жақты зерттеп жүрген Әлімжанов мырза республикалық бюджетке қатысты жиында болғанын айтып берді.
«Үш жылдық бюджет таныстырылған болатын. Біздің сөзімізбен айтқанда, «премьерасы», тұсаукесері болды. Мен әріптестерімнің жұмысын көріп, жақсы әсер алдым. Әрқайсысының бойында білімі де бар, біліктілігі де бар, оты да бар. Әрбір депутат генератор – қозғаушы күш сияқты. Министрге де, вице-министрге де өзекті сұрақ қойып, ортақ жұмысқа қан жүгіртті. Жағадан алмаса да, сөзбен жерден алып, жерге салды. Мен оларға өте риза болдым. Сырттан түк бітірмей жатқан сияқты көрінеді. Бірақ олай емес», – деді Әлімжанов.
