Елорданың тұрмысы төмен отбасыларына көмір сатып алу үшін 20 200 теңге беріледі, деп хабарлайды Neonomad.kz отын-энергетикалық кешені және коммуналдық шаруашылық басқармасына сілтеме жасап.
Қалалық отын-энергетикалық кешені және коммуналдық шаруашылық басқармасының басшысы Ербол Төлеуовтың мәліметінше, жылу беру кезеңінде пешпен жылытылатын жер үйлерде тұратын мүгедектерге, мүгедек балаларға, зейнеткерлерге, жан басына шаққандағы табысы төрт ең төменгі күнкөріс деңгейінен аспайтын (133 432 теңге) көпбалалы отбасыларға әлеуметтік көмек көрсетіледі.
«Өтемақы сомасы 20200 теңгені, яғни 8 айлық есептік көрсеткішті құрайды», – деді Төлеуов жылу беру маусымына дайындық туралы брифингте.
Өтемақы бір реттік екені атап айтылды. Әлеуметтік көмекті алу үшін мұқтаж жандар әкімдікке өтініш жазып, тиісті құжаттарды ұсынуы керек.
Нұр-Сұлтанда жылу беру маусымы кезеңінде бір отбасы шамамен 7-10 тонна көмір жұмсайтын көрінеді. Брифингте көмір сататын жеті ірі компания бар екені айтылды. Төлеуовтың мәліметінше, көмір бағасын өсірмеу туралы меморандум бекітілген.
«Бүгінгі күні көмір бағасы 12 мыңнан 14 мың теңгеге дейінгі аралықта белгіленді», – деді басқарма басшысы.
Тамыздағы жағдай бойынша көмірдің жалпы қоры 19 мың тоннадан асады.
