Нұр-Сұлтан қаласында топтық зорлауға ұшыраған 28 жастағы Саина Раисова басынан кешкен ауыр жайттарды айтты, деп хабарлайды Neonomad.kz ақпарат агенттігі Tengrinews.kz сайтына сілтеме жасап.
2017 жылдың маусым айында жас жігіт қызды үйіне шақырған. Бұл кезде екеуі бірге тұрмаса да, ара-тұра сөйлесіп тұрған. Бір жарым жыл кездесіп, 8 ай бірге тұрған Саина мен жігіті қарым-қатынасын тоқтатқан екен.
«Мен үйге келгенде ол мас болды. Маған айқайлап, балағат сөздер айтты. Артынша досын шақырды. Олар мені зорлап, әрекеттерінің бәрін видеоға түсірді. Артынша өлтіретіндерін, қаланың сыртына апарып, көміп тастайтындарын айтып қорқытты. Сонымен қатар тағы достарын шақырып, зорлаймыз деп қорқытты», – дейді Саина.
Өз өмірін сақтап қалу үшін Раисова осы кезде үшінші қабаттың терезесінен секіріп кетіпті. Салдарынан оған 4 рет ота жасап, құйымшағын алып тастады, миы шайқалған, сүйектері сынып кеткен еді, аяғының сүйегі дұрыс бітпеді, деп аударды Stan.kz порталы.
Саинаның сөзінше, аталған оқиғаға қатысты қозғалған іс бір орыннан жылжымай, күдіктілер бостандықта жүрген. 2017 жылдың қазан айында жас қыз #НеМолчиKZ қорының негізін қалаушы Дина Смайловаға жүгінген.
«Тергеу амалдары кезінде бұрынғы жігітім қашып кетті. 2018 жылдың 18 қаңтарында оның досы 10 жылға сотталды. Әрине, сотталушының тарапынан қорқыту болды», – дейді Раисова.
Зардап шегушінің айтуынша, сот үкімі шыққаннан кейін, желіде өзінің зорланғаны түсірілген видео тарап кеткен. Онда Саинаның беті мен әуретті жерлері жабылмаған екен. Тек зорлаушылардың беті көрсетілмеген. Жас қыз видеоны сотталушының тарапы таратуы мүмкін деп топшылайды. Артынша ол шағым түсірген. Қазір іс уақытша тоқтатылған, алайда видеоны таратқандардың жазалануына қол жеткізетін боламын, дейді.
Жас қыздың бұрынғы жігіті 2019 жылдың 6 наурызында тұтқындалған.
«Сотта ол маған неше түрлі сөз айтып, жезөкше деп атады. Алайда менің мұндайға қатысым жоқ. … Ол соңғы сөзінде мені досына бергені үшін ғана кінәлі екенін айтты», – дейді жас қыз.
Өз сөзінде Саина өзіне сес көрсетіліп, сонымен қатар бірнеше рет шабуыл жасалғанын жасырмады.
Қазіргі уақытта жәбірленушіні арнайы бөлім ардагерлері – URAN республикалық бірлестігінің қатысушылары қорғап отыр. Саинаның сөзінше, прокурорлар сотталушыны 12 жылға бас бостандығынан айыруды сұраған. Ал сотталушы өз кінәсін ішінара мойындапты.
