Бензин бағасының өсуін түсіндірген ұлттық экономика министрлігі мәселе көпбалалы аналар алып жүрген әлеуметтік көмекте дегенге келтірді, деп хабарлайды Neonomad.kz ақпараттық агенттігі КТК телеарнасына сілтеме жасап.
Жаңа жылдан бастап жанармай бағасы 10 теңгеге қымбаттайды. Себебін түсіндірген министрлік, елімізде беріліп жатқан әлеуметтік төлемдердің көбеюін алға тартты. Яғни, жағдайы төмен, көп балалы аналарға берілетін атаулы әлеуметтік көмек. Екіншіден, шекарадан жанармайымызды талап алып жатқан ресейліктерге тоқтау салуға керек екен.
Бірақ, дейді шенеунік, бензиннің қымбаттауы нарық қымбатшылығына соқтырмайды деп тұр.
«Жанармайдың өзіндік құнын жалғыз акциз ғана құрамайды. Сондықтан акциз құны 10 теңгеге өскенімен, бензин де 10 теңгеге өседі деген сөз емес. Мысалы, 2015 жылы біз акцизді 4,5 мыңнан 10,5 мың теңгеге көтердік. Бірақ жанармай бағасы нарықта ондай қатты қымбаттаған жоқ», – Азамат Әмірин, ҚР Ұлттық экономика министрлігінің департамент директоры.
Нарықты қымбатшылыққа әкелмейді деген пікірмен экономика мамандары келіспейді.
«Қазірдің өзінде 57 пайыз дәлізінде тұр. Ал акциз өзінен-өзі бағаны көтерді. Ал баға көтерілгеннен кейін көліктің бағасы көтерілді. Енді сонда қайта сол дәлізге келе ме? Жаңағы 5-7 пайызға? Келмейді! Қиял-ғажайып ертегіде айтылатын дүние. Ал шынтуайтқа келгенде, бұл ешбір қисынсыз әңгіме», – Жангелді Шымшықов, экономист.
Экономистің сөзінше, бұл әрекеттің астарында құр бензин бағасы емес, бюджетті қалай толтырамыз деп қарманған түрі екен.
«Әр түрлі әлеуметтік көмек, ақшалай көмек, тұрғын үй жағынан көмек, тағы басқа. Осының барлығы бюджетке үлкен салмақ салғаны түсінікті. Енді бюджетті қалай толтырамыз деп әлек болып жатыр. Біресе есепшоттарды бірбіріне ауыстырғанда, оған салық салу керек дейді. Айналып келгенде, енді бензинге салық саламыз дейді», – Жангелді Шымшықов, экономист.
