«Әлеуметтік желіні ашып қалсаң болды, «купальник» киген біреуді көресің»,- дейді қазақстандық ашынып. Ол ашық-шашық киінген қыздарды заңмен жазалауды ұсында, деп хабарлайды Neonomad.kz Zamana.kz сайтына сілтеме жасап. 

«Әу баста жалаңаштануды жарнамаға айналдырған Айжан Байзақова есімді біреу еді. Соңыра бұл дарақылық қаншама бойжеткеннің ойын бұзды. Тіпті әнеугүні «Еуразия» телеарнасынан берілетін «Пендеміз ғой» бағдарламасында да тілі орысша, кеудесі жартылай ашық, саны жылтыраған бір қыз көрермендердің алдында «артымен» билеп берді. Сөйте тұра ол бұл қылығын ерсі санамайтынын, өзіндегі барды көрсеткенде тұрған ештеңе жоқ деп ойлайтынын да ашық айтты»,- дейді автор.

Автордың сөзінше, жалаңаштанған қыздардың мақсаты – еркектердің назарын өзіне аудару. Сонымен қатар, әлеуметтік желіден лайк жинап, аудиториясын көбейтіп, сол арқылы ақша табу.

«Бұл заманда әлеуметтік желіде жазылушылары көп адам парақшасын пайдаланып, оп-оңай ақша жасай алады. Демек, хайп жасау арқылы тез әрі оңай табысқа қол жеткізуге, желіде жұлдыз атануға мүмкіндік бар», – дейді ол.

Әлеуметтік желіде тәнін жарнамалап жүрген қыз уақыт өтісімен телеарналарға сұқбат беріп, танымалдыққа қол жеткізетінін айтады автор.

«Мұндайларға заң тарапынан да шектеу жоқ. Ең болмаса миллиондап айыппұл салса ғой. Сол кезде қадамдарын аңдып басар еді, баспағаны айыппұл төлеп, тым болмаса мемлекетке аз да болса пайда әкелер еді. Ана да әй демейді, әке де қой демейді. Әрине, шектеу болмаған соң тоқтау да болмайды. Өз басым ашық-шашық әлемге заңмен ғана тыйым салуға мүмкіндік бар деп ойлаймын», – дейді автор.