Ақмола облысында жемқорлыққа қатысы бар деген күдікпен екі полиция полковнигі ұсталды, деп хабарлайды Neonomad.kz ақпараттық агенттігі Sputnik Қазақстан сайтына сілтеме жасап.
Күдікке ілінген екі полковниктің бірі Ақмола облысы полиция департаменті бастығының орынбасары, ал екіншісі болса қаржылық қамтамасыз ету басқармасының бастығы болып табылады. Олар сеніп тапсырылған мүлікті иемденді немесе талан-таражға салды деп айыпталуда.
«ҰҚК департаментінің ведомствоаралық жедел-тергеу тобы мен полиция департаментінің өзіндік қауіпсіздік басқармасы оларға қатысты Қылмыстық кодекстің 189-бабы 3-бөлігі бойынша (сеніп тапсырылған өзгенің мүлкін иемдену немесе талан-таражға салу) қылмыстық іс қозғады», – деп хабарлады облыстық полиция департаментінің баспасөз қызметінен.
Егер олар айыпты деп танылса, онда кінәлілердің мүлкі тәркіленіп, екі жылдан жеті жылға дейінгі мерзімге бас бостандығынан шектелуі немесе сол мерзімге бас бостандығынан айырылуы мүмкін, кейбір жағдайларда ірі көлемде айыппұл салынады.
