Қазақстан президенті Қасым-Жомарт Тоқаев Жер кодексінің жекелеген нормаларына қатысты түпкілікті шешім қабылдауды тапсырды, деп хабарлайды Neonomad.kz ақпарат агенттігі Sputnik Қазақстан сайтына сілтеме жасап.
Президент 2021 жылы Жер кодексінің жекелеген нормаларына жарияланған мораторий аяқталатынын еске салды.
«Осыған байланысты бұл мәселе жөнінде түпкілікті шешім қабылдауымыз керек. Негізгі мәселені айқындап алдық. Жер шетелдіктерге сатылмайды. Бұл мәселеге енді оралмаймыз», – деді Тоқаев үкіметтің кеңейтілген отырысында.
Ол игерілмеген жерлерді анықтап, оны алып қою мақсатында ғарыштан мониторинг жасау заңнамалық тұрғыдан бекітілгенін атап өтті. Айтуынша, түгендеу барысында анықталған игерілмеген 12,8 миллион гектар жердің 7 миллионы мемлекетке қайтарылды.
«Жерді алдың ба, оны игеру керек», – деді мемлекет басшысы.
Бұдан бөлек, президент күзгі егін жинау науқанына қазірден бастап дайындалу қажеттігін айтты.
