Қазақстан шахмат федерациясы 2017 жылы Алматы, Қызылорда және Павлодар қалаларындағы 18 мектепте шахматты мектеп бағдарламасына енгізу бойынша пилоттық жобаны іске қосқан болатын. 1000-нан астам үшінші сынып оқушылары биыл екінші жыл қатарынан шахмат бағдарламасын жете меңгеріп, түрлі турнирлерде бақ сынауда, Neonomad.kz хабарлайды.
Атап айтсақ, маусым айында еліміздің үш қаласында «Мектептегі шахмат» бағдарламасымен оқитын оқушылар арасында шахмат турнирлері ұйымдастырылды.
«Пилоттық жоба жемісті болып, оқушылардың басқа да пәндер бойынша үлгерімі жақсара түсті», – дейді Қазақстан шахмат федерациясының жоба менеджері Салтанат Ноғайбаланова.
Жоба жетекшісінің айтуынша, өткен жылдан бастап жобаға Шымкенттің 26 мектебі қосылса, 2019 жылдың қыркүйегінен бастап республиканың отызға тарта қала және ауылдарындағы 40 мектеп қосылған. Сондай-ақ, алдағы жаңа оқу жылынан бастап 7800-ден астам оқушы шахмат ойынын үйренеді деп жоспарланған.
Аталмыш турнирге әр пилоттық сыныптан 5 оқушыдан, 175 қатысушы қатысқан. Алматы қаласы бойынша қатысушылар арасынан №175 гимназияның 3 «Г» сыныбынан құралған «Жаңа ғасыр» командасы үздіктер қатарынан көрінді. Ал, Қызылордадағы көрсеткіштің көшін №2 «Мұрагер» мектебінің 3 «А» сыныбы бастаса, Павлодар қаласы бойынша өткен турнирдің жеңімпазы болып №41 орта мектебінің 3 «В» сыныбы танылды.
«Оқушылардың білім деңгейі өскен. Ұстаз ретінде де, төреші ретінде де біз бұны жақсы сезіндік. Балалар сенімді ойын көрсетті. Қарсылас тарапынан қате қадамдарды жасалса бірден байқап, төрешіге жүгіне алды. Бұл арқылы біз олардың ойын ережесін жақсы меңгергенін аңғардық, – дейді Қазақстан шахмат федерациясының атқарушы директоры Ирина Грищенко.
Сайыс қорытындысы бойынша, жүлдегерлерге дипломдар мен медальдар табысталды, жеңімпаз мектеп командасы арнайы кубокқа ие болды. Сондай-ақ, биылғы жылы федерация пилоттық сыныптарда жұмыс істейтін мұғалімдерді де марапаттан тыс қалдырмады.
