Бірыңғай жинақ зейнетақы қоры қайтыс болған азаматтың туыстарына жерлеуге жұмсау үшін бір реттік төлем берілетінін айтты. Сондай-ақ, бұл ақшаны алу үшін қандай шарттар бар екенін түсіндірді, деп хабарлайды Neonomad.kz ақпарат агенттігі Stan.kz сайтына сілтеме жасап.
«Азаматтардың жеке зейнетақы шоттарындағы міндетті зейнетақы жарналарынан, міндетті кәсіптік зейнетақы жарналарынан және ерікті зейнетақы жарналарынан түскен ақшалар, өзге де жинақтар салымшылардың меншігі болып табылады және БЖЗҚ-да мерзімсіз сақталады. Бұл қаражат адам қайтыс болғаннан кейін де оның меншігі болып қала береді», – деді басқарма төрағасының орынбасары Сәуле Егеубаева.
Қазақстан Республикасының Заңына сәйкес, азамат қайтыс болған жағдайда оның қордағы ақшасы белгілі тәртіпте және толықтай мұрагерлеріне беріледі.
«Тағы бір ескерте кететін жәйт, Қазақстан Республикасының «Қазақстан Республикасындағы зейнетақымен қамсыздандыру туралы» Заңына сәйкес алушы немесе БЖЗҚ-да зейнетақы жинақтары бар тұлғалар зейнет жасына жетпей қайтыс болған жағдайда оның отбасына не жерлеуді жүзеге асырған тұлғаға Қордан республикалық бюджет туралы заңда тиісті қаржы жылына белгіленген айлық есептік көрсеткіштің 52,4 еселенген мөлшері шегінде, бірақ жеке зейнетақы шотындағы қаражаттан аспайтын біржолғы жерлеу төлемі беріледі», – деді төраға орынбасары.
2019 жылдың 1 қаңтарына бұл сома 132 310 теңгені (52,4 * 2 525 = 132 310 теңге) құрайды.
Егер салымшының (алушының) жеке зейнетақы шотындағы зейнетақы жинағындағы қалдық ақша жерлеуге біржолғы төлемді жүзеге асырғаннан кейін республикалық бюджет туралы заңда тиісті қаржы жылына белгіленген ең төменгі зейнетақы мөлшерінен аспайтын болса, аталмыш қалдық ақша жерлеу төлемі ретінде төленеді.
